PSG-in Hakimi an lalut ta

Paris St-Germain chuan rei tak sawi zawm an nih hnuah Inter Milan right back Achraf Hakimi chu an lalut fel ta a, kum nga chhung atan contract an ziahpui.

Morocco international hi Chelsea nen pawh sawizawm a ni a, mahse, London lam aiin Paris khawpui lam hawiin a puanthuah a tel ta zawk a ni - a man hi pound maktaduai 60 a ni.

Kum 22 mi defender hian season hman zawh takah khan Inter Milan chu Serie A nomawi a chawipui a, league match 37-a khelhah goal sarih khungin assist vawi 10 a nei thei.

Hakimi chuan, "PSG ka zawm theih avang hian ka inchhuang ru viau a ni. Spain, Germany leh Italy-a tawnhriat ka neih hnuin PSG chuan khawvela club ropui ber pawl hmangin inelna thar ka hmaah min chhawpsak a ni," a ti a, Ligue 1 club lama kal chu a tan chona thar a nih thu a sawi.

Morocco tan vawi 36 inlana goal li khungtu Hakimi hian Real Madrid aṭangin a career a ṭan a, Madrid khaw club-ah beisei anga hmun a chan theih loh avangin kum 2018 khan Borussia Dortmund chu kum hnih chhung loan-a khel turin a zawm.

Dortmund-ah kum hnih hun a hman hnuin season hmasa ṭan dawn khan Inter Milan hi a zawm a, kum khat a khelh hnuah PSG lam hawiin a pem leh ta a ni.

PSG hian Georginio Wijnaldum chu Liverpool aṭangin free transfer-in an lalut tawh a, Real Madrid captain hlui Sergio Ramos leh Italy goalkeeper Gianluigi Donnarumma nen sawizawm mek an ni bawk - he thuziak i chhiar meuh chuan an inlalut fel tawh hial mai thei.