Barca-in player thar an ziak lut thei lo

Catalan club talbuai Barcelona-in a lawmawm loh zawngin thuthar an nei leh tawh a, khawthlang media-te chuan Barca hian player hlawha club pakhatin a hman theih zata aia tam player hlawhah an sen mek avangin player thar an ziak lut thei rih lo.

Barcelona hian Eric Garcia, Memphis Depay, Emerson leh Sergio Aguero te chu nipui transfer-ah an lalut a, an player lakluhte pawh hi an squad list-ah an ziak lut rih thei lo tihna a ni!

Tuna Barca chanchina langsar pawl chu Lionel Messi a ni a, club president Joan Laporta chuan an player chhuanvawr hian contract thar a ziah ngei tur thu a sawi - khawthlang media-te chuan Messi hi a cham ngei dawn a, mahse, La Liga hlawh bituk huanga an awm theih nan player thenfai hna an thawh chu an nghak mek phawt niin an sawi.

Barca hian centre back Jean-Claire Todibo (Nice, €8.5m), Konrad de la Fuente (Marseille, €3m), Junior Firpo (Leeds United, €15m), Matheus Fernandes (free transfer) leh Francisco Trincao (Wolves, loan) te chu an chhuahtir tawh. Samuel Umtiti leh Miralem Pjanic pawh chhuak tura ngaih an ni a, Martin Braithwaite leh Philippe Coutinho-te chu chhuahtir an tum bawk.

Player pali hi an chhuak vek a nih chuan Barca hian kum khatah euro maktaduai 64 vel chu an hum thei dawn tihna a ni a, khawthlang media-ten an tarlan dan chuan Barca hian euro maktaduai 200 vel talin an player-te hlawh an tihhniam a la ngai - leiba euro tluklehdingawn 1.2 vel an la nei cheu!