Leeds United defender thar Firpo

Premier League club Leeds United chuan full back Junior Firpo chu Barcelona aṭangin an lalut a, Elland Road-ah hian kum li chhung khel turin contract a ziak.

Kum 24 mi defender man zat hi pound maktaduai 13 bawr vel nia sawi a ni a, Leeds hian an hralh leh a nih chuan Barca hian a hralhna man aṭanga 20% chu an chang ve leh ang.

Firpo chuan, "Leeds-ah hian ka nihna dik tak ka pholan theih ka beisei," a ti a, Premier League-ah a theihna sang bera khel chhuak turin a inbuatsaih.

Spain Under 21 international hlui hian season hman zawh takah khan Barcelona tan inelna hrang hrangah match 18 a khel ve hram a, goal khat khungin assist vawi khat a nei.

Dominican Republic-a piang, kum ruk mi lek a nih laia Spain-a pem lut Firpo hian Real Betis-ah a career a ṭan a, B team tana a khelh hnuah kum 2017 khan La Liga-a a match hmasa ber chu senior team tan a khel.

August 2019 khan Barcelona a pan zui a, a hunlai hian a man zat hi euro maktaduai 18 niin, a khelh ṭhat dan a zira euro maktaduai 12 pek belh turin an ziak tel.

Barcelona-a a season hmasa berah match 23 a khel a, nikumah match 18 lek a khelh leh tak avangin a khelh tam theihna tur nia a ngaih lam a pan.

Firpo hian Leeds manager Marcelo Bielsa a ngaihsan vanga Elland Road thlang a nih thu a sawi tel a, Bielsa hian La Liga lamah Espanyol leh Athletic Bilbao a lo enkawl tawh.

Season hman zawh taka Barca tana Copa del Rey nomawi chawitu Firpo chuan, "Bielsa hi coach a nihna angin ka hrechiang a, ka tan chuan coach ṭha tak a ni. Goal nawr reng duh mi a ni a, chu chu ka tan chuan football dik tak a ni," a ti.

Firpo chuan sawi zawmin, "Football rorum tak khelh a, tlan tam chunga ball ken reng hi ka tan buaina a ni dawn lo a, level sang tak thleng turin Bielsa hian min puih theih ka beisei," a ti a, coach chungah rinna a nghat thui hle.