Match 33 chak loh nei tawh lo ITALY

Italy-in European Cham-pionship final an lut a ni ringawt lo a, Roberto Mancini hote hian match 33 chhung chak loh an nei tawh lo. Azzuri chak loh hnuhnun ber chu September 10, 2018 daih tawh kha a ni a, Portugal 1-0 in an hneh lo a, hemi hnu hian chak loh an nei tawh lo.

Italy hian kum 2019, 2020 leh 2021-ah hneh loh an tawng tawh lo a, Mancini hnuaia an record hi a ṭha hle. Euro 2020 semifinal-ah Spain nen harsatna tawk deuh mah se Azzuri hian final khelh hi an phu an ni.

Ole, Ole Spina
Italy-in quarterfinal-ah Belgium an hneh a, hemi ṭum hian an player pawimawh Leonardo Spinazzola a inhliam. Italian wing back Spinazzola inhliamna hi pheikhawng chat (achilles tendon) a ni a, thla ruk chhung a chawlh a ṭul dawn avangin tun Euro 2020-ah chuan a inlan dawn tawh lo.

Spain nen pawh hian Spinazzola aiah Emerson a rawn lut a, Chelsea wing back hian Roma defender hi thlak zo loin minute 73-naah Rafael Toloi-a'n a rawn thlak ve leh.

Chutihrualin Italy team hian Spinazzola hi an theihnghilh lo a, La Roja an hneh zawh hian 'Ole, Ole, Ole, Ole, Spina! Spina!" tiin an zai rual a, Spinazzola kawr an pawt parh bawk.

Mancini team chu
Tun ṭuma Italy team ṭhat lehzualna tak chu team inlungrualna hi a ni a, Roberto Mancini thawhrah a ni. Azzuri hian Gian Piero Ventura hoin World Cup 2018 an inpettling zo lo a, an tla chhia tih hiala sawi an ni hman.

Italy-in team thar din turin tum fel fai tak nei Mancini an lalut a, Manchester City manager hlui hnuaiah hian bul an ṭan ṭha hran lo. An match hmasa berah Saudi Arabia 2-1 chauhin an hneh a, France lakah 3-1 in an tlawm zui.

Azzuri hi Netherlands leh Poland lakah 1-1 ve a an inhnehtawk hnuah Portugal lakah 1-0 in an tlawm leh a, match nga chhungin vawi khat chauh chakin vawi hnih an chak lo. Hemi hnu hian Italy team an insiamṭha ta a, tun thlengin hneh loh an tawng tawh lo.

An thiam bel
Italy-in Mancini hnuaiah 4-3-3 formation an hmang a, an khelh dan phung hi an bel hle. Euro 2020 hma khan match 35 aṭanga match 32-ah 4-3-3 formation hi a hmang a, group stage aṭanga semifinal thlengin 4-3-3 formation vek a hmang leh bawk.

Mancini hian player naupang a chhawr ngam a, club khelhna a en lo - club tenaua khel player pawh ni se a duh ang player an nih chuan a thlang zel. Tun hma chuan Italy hi Juventus, Inter Milan leh AC Milan aṭang tea thlan an ni tlangpui a, tun ṭumah hian Sassuolo player pathum Manuel Locatelli, Domenico Berardi leh Giacomo Raspadori te an tel a, a hmasa pahnih hian hmun pawimawh an chang pha.

Chutihrualin Mancini hian player pawh a enchhin nasa a, Euro ṭan hmain player 67 a chhawr hman. Inelna ṭan hnuah erawh player chhawr bik neiin an inhliam emaw an khelh ṭha tawk lo a nih pawhin a thlakna tur player a nei nghal zel.

An phu e
Italy hi Euro 2020-a an match hmasa bera Turkey an hmachhawn ṭumin an hmuhnawm nghal a, Swit-zerland-ah an hmuhnawm lehzual. Wales nena an inkhelh ṭumin player thlak hlawk mah se hnehna an chang tho a, group stage-ah goal sarih khungin goal an chhuah lo.

Knockout stage-ah Italy-in match tinah goal an chhuah vek a, chutichung chuan Azzuri hian fak an phu. Austria hneh turin extra time khelh ngai mah se Belgium lakah inkhel thunun chungin 2-1 in an chak.

Italy manager Roberto Mancini chuan, "Inkhelh ṭhenkhatah chuan khelh ṭhat tawk loh ṭum a awm a, khingpuite khelh ṭhat zawk ṭum a awm. Chutichung chuan final thlen hi kan phu. Tu pawhin chak an duh vek a, ka naute hi chu an danglam a, an tum an la tihlawhtling zel. Inelna ṭan hmain mi tam takin final kan thlen an ring lo a, kan thleng miau si," tiin final thlen an phu thu a sawi.

Spain chungchang sawiin Mancini chuan, "Spain khan striker tel loa khelh an thlang a, kha khan min ṭhawng a, khelh an harsa bawk. Team ṭha tak an ni a, penalty chu a vanneih zawk chakna a ni," tiin a ṭawng uang duh lo.

Penalty-ah a vannei zawk an chak ṭhin
Italy leh Spain inkarah La Roja-in penalty record an nei ṭha hret a, Euro 2020 semifinal-ah erawh Azzuri an vannei zawk. European Championship-ah hian inelna vawi khata penalty shootout-a vawi hnih chak thei an la awm lo a, penalty hmanga Switzerland hnehtu Spain-in he record hi an thai chhe thei lo.

Euro 2016-ah khan Italy hian quarterfinal-ah penalty hmangin Germany an hneh lo a, an sulhnu thlir letin penalty shootout-ah chak loh ṭum an ngah zawk. Spain lakah erawh Manuel Locatelli-a'n penalty hlah nghal mah se Jorginho-a'n mawi tawpa mawia penalty pet lutin chakna a khung.

Rawlthar duhawm bik Pedri
Spain chak lo mah se an midfielder Pedri chet dan chuan sawi zui a hlawh a, manager Luis Enrique chuan a player chet dan chu a beisei phak baka ṭha leh hmuhnawm a nih thu a sawi chhuak. Barcelona midfielder hi kum 18 mi chauh la ni mah se Euro-ah Spain tan hmun pawimawh a chang phak, captain Sergio Busquets nen midfield lailum aṭanga inkhel thununtu an ni.

Enrique chuan, "Tun tournament chhung zawnga Pedri hnathawh kha a ropui, kum 18 mi ni chung chuan tu mahin khatiang khan an ti ve thei lo ang - Andres Iniesta meuh pawhin a tlin bik lo," tiin a player lakah khatiang anga sang bak beisei theih a nih loh thu a sawi.

Semifinal-a Italy an hmachhawn ṭumin Pedri hian hun pangngaiah ball vawi 55 a pass a, a dik vek. Extra time nena belhkhawm pawhin pass vawi 65 a neih chu 97% a dik thei hial, vawi hnih chauh pass dik loh a nei tihna a ni.

Penalty pet hma khan hahdam takin ka awm a, ka team ka ṭanpui thei tih ka hriat vang a ni. Kan duhthusam tihlawhtling turin pen khat chiah pen leh a ngai ta a, min thlawptute zawng zawng chungah lawmthu ka sawi a ni. Spain team hi an ṭha takzet a, mahse, he Italy team hi kan huaisen em em a, kan beidawng ve ngai lo.
- Gianluigi Donnarumma, Italy goalkeeper

Mi zawng zawngin Italy kha team ṭha zawkah an ngai a, mahse, kan chungnun zawkzia kan pholangin ka hria. Player naupang, tawnhriat nei tlem tak tak nen inelna kan hmachhawn a, tun inelnaa an tawnhriat hian inrintawkna tam tak a pek belh dawn a ni. He team hi kan chawl mai dawn lo a, kan lo kir leh ang. Kan duh ang takin kan khel - ball kan chang tam zawk a, kan hloh apiangin rang takin kan chhuh let a, a pumpuia thlir chuan kan ti ṭha zawk. Mahse, football chu hetiang hi a ni a, tuna kan tih theih chu Italy lawmpui mai hi a ni.
- Sergio Busquets, Spain midfielder

Ka player-te kha mark pe dawn ngat ila chuan, 'excellent' tiin ka ziak ang. An khel ṭha takzet a, sawisel aiin fak an phu zawkah ka ngai a ni. Tunah chuan an tan chawlh hahdam ve a hun ta. Morata khan a kap bawrah hliam a nei a, mahse, chuti chung chuan huaisen takin penalty a pet a, chu chuan a mizia dik tak a tarlang chiang hlein ka hria - tun inelnaah chuan kan tana player pawimawh ber pawl a ni. Professional infiamnaah chuan hnehna chan dan kan zir ang a, tlawm dan pawh kan thiam tur a ni - chuvang chuan Italy ka lawmpui takzet. Euro-a team ṭha ber pawl kan ni tih hre chungin, thlamuang takin Spain panin kan haw dawn a ni.
- Luis Enrique, Spain coach

Ka rilrua thil awm hi thua sawifiah chi a ni lo. Match hautak a nihzia chu nangni pawhin in hre vek a, Spain khan an khel ṭha takzet. Mahse, tunah chuan final kan lut ta a, July 11 zanah kan lo kir leh dawn - eng nge thleng kan hre zel ang chu.
- Federico Chiesa, Italy goal khungtu leh Star of the Match