Rafael Nadal leh Federer inlan dawn

Tennis inelna ngaihhlut bik Grand Slam pali zinga pakhat Australian Open chu vawiin aṭangin khelh ṭan a ni a, world number 1 leh seeded pakhatna ni bawk Rafael Nadal chuan chawhma dar 11:30 hian Victor Estrella Burgos a hmachhawn nghal dawn.

Champion lai Roger Federer-a'n chawhnu dar 1:30-ah Aljaz Bedene a tum thung dawn - Novak Djokovic chuan Thawhlehniah a match hmasa ber an khel ve thung ang.

Season hmasa khan Grand Slam pali chu Nadal leh Federer ten pahnih ve ve in an insem a, senior player pahnih hi an dam ṭha a nih chuan midang tana hmachhawn châkawm loh tak an la ni. Serbian tlangval Djokovic tan champion hnem ber record siam theihna hun a ni dawn.

Hmeichhe lamah erawh Jelena Ostapenko leh Sloane Stephens an nomawi lian hmasa ber an chawi a, champion lai Serena Williams a inlan dawn loh avangin rinkai ber tia sawi tur an awm bik lo - world number 1 Simona Halep leh Wimbledon champion Garbine Muguruza te bakah Maria Sharapova ten enbik an hlawh ang.

Roger leh Rafa
Season hmasa khan Roger Federer-a'n world number 18 ni chungin bul a ṭan a, rinkai tak a ni lem lo. January thla tirah Switzerland chu Hopman Cup a chawi pui a, an ram a hlawhtlin pui hnuah Australian Open champion a ni zui nghal thei.

Grand Slam vawi 19 champion tawh Federer hian Wimbledon a chawi zui a, season tluan khan match nga chiah chak loh a nei. A vanglai pawha a hneh hleih theih loh Nadal nen vawi li an intawnah hnehna a chang vek a, kuminah pawh ṭum dang ang bawkin inrintawkna nen a khel leh dawn.

Chutih rualin Federer tan kumin hi a kum 37-na a ni tawh dawn a, player naupang leh tha za rualte hmaah set nga khel turin a la ṭha tawk em tih chu khawvel hmuh châk a ni.

Kum 31 mi Nadal hi world number 1 ni chunga season khar thei upa ber a ni a, nikuma Australian Open nomawi a chawi loh chhan chu final-a Federer a ngam loh vang chauh a ni. Seeded pakhatna Nadal leh pahnihna Federer te hi an kaltluang a nih pawhin final hma chuan an inhmachhawn thei dawn lo.

Spanish tlangval Nadal hi a khup hliam vangin season tawp lamah chawl hma deuh mah se tunah chuan a dam ṭha tawh a, Grand Slam nomawi 16 a neih tawh belhchhah turin a inpeih tawh hle. Nadal chuan, "Phurna leh tihtak zetna tel lo chuan Australian Open hi chawi theih a ni lo," tiin a sawi.

Toni Nadal-a'n a chawlhsan rih avangin world number 1 hlui Carlos Moya kaihhruaina hnuaiah Nadal hian inelna lian a hmachhawn dawn a, tennis nun bul a ṭantirh aṭanga kaihruaitu a coach leh patea (uncle) ni bawk Toni tel lo tur hi Nadal tan a khawharthlak rualin chona thar a ni ang.

Player dang
Grand Slam vawi thum champion tawh Andy Murray chu a khel bawr na vangin a inlan thei dawn lo. Britain tlangval hi May thla vela rawn kir chauh tur a ni ang. Hliam dam hlim Stan Wawrinka leh Novak Djokovic te hi dam tawh mah se duhthusamin inbuatsaihna an nei thei lo.

Melbourne-a vawi khat champion tawh Wawrinka hian inbuatsaih nan tournament a khel miah lo a, kum dang aiin beisei san ngam a har ang. Vawi ruk champion tawh Djokovic pawh hian nikum Wimbledon hnuah inelna lian a la hmachhawn leh bik lo - coach Radek Stepanek leh Andre Agassi te kaihhruaina hnuaiah a khel ang.

German rawlthar duhawm Alexander Zverev-a'n season hmasa khan nomawi pali a chawi thei a, kum 20 mi Zverev hi hming langsar sa Federer, Nadal leh Djokovic te chhiar tel pawhin champion beiseiawm leh hlauhawm zingah a tel pha a ni.