Aizawl FC hmalam panin an kal zel

Salt Lake Stadium-ah Aizawl FC-in Mohun Bagan hneh lo mah se Mizo club an tlu rei lo - kar khat ral hmain Mizo mipui hmaah Chennai City chu Rajiv Gandhi Stadium, Mualpuiah-ah 2-0 in an hneh. Naktuka East Bengal hmachhawn turin an inpeih.

Inrinni inkhelah hian Aizawl FC-in Yugo Kobayashi penalty hmangin minute 26-naah hma an hruai a, David Lalrinmuana'n minute 33-naah a khung leh bawk.

Zemabawk North tlangval David-a hi goal hmasa zawk luh theih nan pawh hian a ṭangkai a, minute 59-naah hliam vangin lak chhuah ni mah se a inlan chhunga a lansarh miau avangin hero of the match-a thlan a ni.

Game mawitu David-a
Aizawl FC-in Mohun Bagan an khelhin inhliam vangin David-a an chhawr thei lo a, Mizo club goal nawr a na tawk lo. Chennai City an hmachhawn ṭum hian David-a bakah Japanese forward Yugo, winger Albert Zohmingmawia leh left back C. Lalrosanga ten inkhel bul an ṭan a, Paulo Meneses-a'n starting eleven-ah player pali a thlak danglam.

Ṭan phat aṭangin Aizawl FC goal nawr a na nghal a, Chennai City left back Pradeep Mohanraj-a'n Kawnpui tlangval Albert a chelh theih loh avangin mikhual tlarhnung a pawp phah hle. Amaherawhchu Albert-a'n match fitness a neih loh avangin a tawp a khar fuh thei lo a, goal a keng tel lo.

Aizawl FC-in chance mumal an insiam thei lo a, David-a'n a thiamna hmangin Chennai City defender bum kualin Mizo tlangval dan tumtu Kyrgyzstani defender Veniamin Shumeiko kutin ball a dan avangin Mizo club-in penalty an hmu a, Japanese forward Yugo chuan goal-ah a chantir.

Chennai City an insiamṭha lo a, tlarhnung an tihphui loh avangin minute 32-naah David-a'n cool takin a pet goal a, Slovenian keeeper Uros Poljanec-a'n a ban pha lo. Mizo club-in goal hnih an khung hma avangin hun tawp thlengin hahdam takin an khelh theih phah.

MK-a thlaktu?
Aizawl FC coach Paulo Meneses-a'n FC Goa pan ta H. Lalmuankima thlakna a zawng chho zel niin a lang. Tawnhriat nei ṭha S. Malsawmtluanga'n inkhel bul vawi hnih a ṭanah tihsual a nei meuh lo a, amaherawhchu tun hma anga thahrui a ngah tawh loh avangin tlarhma lamah danglamna a thlen phak lo.

Chutihrualin Albert-a'n inhliam loa hun a hman chhoh theih chuan winger ṭha an nei a. substitute-a ṭhu Rochharzela hi Mizoram Premier League ang thoa I League-a a tlangnel chhoh theih chuan ṭangkai ang.

Mizo club-in I League-a striker langsar ni pha striker an kawl loh avangin nomawi humhim turin mual sir lam aṭanga an nawr thiam a ṭul chho zel dawn a, hei vang tak hian Ivorian winger Leonce Dodoz, Mama, Albert leh Chhara-te hi an la pawimawh dawn chauh a ni.

Chak phu AFC
Chennai City coach V Sounda-rarajan chuan, "Tun inelnaa kan khelh chhiat ber ṭum a ni a, point hmuh duh mah ila kan khelh dan khan a phu lo - Aizawl FC khan chak an phu a ni. Chutihrualin Aizawl FC khan clear chance an neih ka hre lo a, kan tihsual vanga chak lo kan ni," tiin a sawi.

Mikhual team hian 23% chauh ball an chang chungin goal chance erawh an nei ve tho a, French forward Jean Michael Joachim goal khung tur chu Avilash Paul-a'n a dang a, AFC keeper hian Soosai Raj ball pet a dan sak bawk. Amaherawhchu Chennai City boss Soundararajan sawi ang hian Mizo club chu chak phu zawk.

Entu an tlem
Aizawl FC leh Chennai City inkhel entu hi official record-a a lan dan chuan 3620 a ni. Chawhrualin match li khelh tawhah hetiang zat vel hian inkhel an en ṭhin.

I League club 10 zingah Mizo club aia entu nei tlem chu Churchill Brothers leh Indian Arrows te chiah an ni.

Mizo club hmachhawn leh tur East Bengal hian an mualah chawh rualin match tinah 11,950 entu an nei ṭhin. January 20, Inrinnia Aizawl FC hmachhawn tur Neroca phei chuan entu an neih tlem berah pawh 27,633 an pung khawm pha a, Mizo mipuiin mahni club ṭan kawngah Manipur an pha lo hle.

He ti chung hian Aizawl FC coach Paulo Meneses chuan, "Mipui hi kan chakna hnar an ni a, kan muala result ṭha kan neih chhanah hian an thawh hlawk hle," tiin Mizo mipui a fak.

Entu tlem chhan hi TV lama inkhel a chhuah ziah vang a ni thei a, Aizawl FC inkhel en man hi mipui nawlpui tan a sang lutuk pawh a ni thei a, ticket lei turin an chhawpchhuak thiam tawk lo pawh a ni thei a, Aizawl FC thuneitu lamin ngaihtuahna an si e.

Hmabak East Bengal
Aizawl FC-in naktuk hian East Bengal an hmachhawn dawn. Kolkata club hian Mizo club I League champion puitu coach Khalid Jamil bakah player pawimawh Lalramchullova, R. Laldanmawia, Brandon VL Remdika leh Mahmoud Al Amna te an lalut a, hei vang hian inkhel tur hian ngaihven a hlawh ang.

Aizawl FC coach Paulo chuan, "Kan mualah tu nge ṭha zawk chu kan ching fel ang. Defensive game khelh kan tum lo. Kei ni hi champion lai kan ni a, attacking game nen East Bengal hi kan hmachhawn dawn," tiin a sawi.

Inrinni Vanglaini chhuak a, Pathiannia Kolkata Derby inkhel tur anga tarlan kha I League fixture thlak danglam vanga tihsual a ni. Kolkata Derby hi January 21 hian East Bengal leh Mohun Bagan ten an khel ang.