Kane-a record siam zanah Tottenham chak

Tottenham Hotspur striker Harry Kane chuan Spurs tana Premier League-a goal khung hnem ber ni turin London club tan Inrinni zan khan goal hnih a khung a, an mikhual Everton lakah 4-0 in a team hi hnehna a chanpui.

Spurs tan Son Heung-min chu player langsar a ni bawk a, South Korea international hian goal hmahruai a khung bakah Kane tan goal khat a siam sak a, post a pet per bawk. Spurs goal khat dang hi Christian Eriksen a khung a ni thung.

Inkhel chu
Spurs khelmualaah Wayne Rooney-a'n goal hmahruai a khungah inngai mah se offside vangin pawm a ni lo a, a bak chu Spurs ta a ni tawh–minute 26-na lekah Son chuan Serge Aurier cross hmangin goal hmahruai a khung a, Kane-a'n goal hnih a khung chhunzawm–English striker goal hnihna hi offside ngei niin lang mah se linesman berin a phar tlat lo.Minute 81-naah Eriksen chuan goal a khung ve leh a, he goal lut tur hian Spurs player 11-ten ball an inpe kual vek–team goal diktak a ni.

Tottenham-in match ruk chhung a zawnin tlawm hmel an hmu tawh lo a, Everton tan match ruk chhung a zawna chak hmel an hmuh zawh lohna a ni thung–match li an tlawm. Toffees manager Sam Allardyce-a'n a striker thar Cenk Tosun chu a match hmasa ber khelhtir mah se Besiktas aṭanga pound maktaduai 27-a a lakluh striker hian target-ah shot a nei lo.

Kane = record
Kane-a'n tun season-ah league goal 20 a khung tling leh der tawh a, inelna hrang hrangah match 28 khelin goal 28 a khung. England international hian Spurs tana Premier League-a goal khung hnem ber record siam turin match 135 a mamawh a, goal 98-na a khung khan goal khatin Teddy Sheringham a khum chiah–tuna ISL club ATK coach Sheringham hian goal 97 khung turin match 237 a mamawh thung.

Kum 24 mi striker hian league lamah record siam mah se inelna pumpuia goal khung hnem ber ni tur erawh chuan hmabak a la ko hle–match 193-ah goal 127 a khung tawh a, record nei mektu Jimmy Greaves chuan match 379-ah goal 266 a khung. Tottenham manager Mauricio Pochettino chuan, "Kane hian fak a phu ngawih ngawih a, tuna a khelh dan anga a khelh reng chuan Premier League record hi chu a khum vek mai ang," tiin a striker chu a chhuang hle.

Inkhel Result
Chelsea 0–0 Leicester City
Crystal Palace 1–0 Burnley
Huddersfield Town 1–4 West Ham United
Newcastle United 1–1 Swansea City
Watford 2–2 Southampton
West Brom 2–0 Brighton & Hove Alboin
Tottenham Hotspur 4–0 Everton