Hrangthanmawii Memorial MSV Open

Inrinni khan Hrangthanmawii Memorial Mission Veng Open 2018 chu DYO Hall - Mission Veng Indoor Stadium-ah khelh zawh a ni a, Samuel Lalnunmawia chuan Lalmuanawma hnehin mipa singles-ah a champion.

Tualchhung badminton inelna hi Muanawma leh Samuel-a ten hun rei tak an thunun tawh a, tun thlengin elpha an awm lo. Nikum kum tawp lama neih Mamit Open-ah khan Hlimen tlangval Muanawma hi a champion thung.

Men's doubles 35+ ah Muanawma hian Lalrindika kawppuiin pakhatna dinhmun a luah bawk a, men's doubles-ah Lalduhawma leh Abel Lalnunsanga te inkawp chuan R. Lalbiaksanga leh Zodinmawia te ṭangdun an hneh ve bawk.

Mission Veng Open hi kum 2007 aṭanga khelh ṭan a ni a, inelnaah hian kum 11 hnuai lam inelna thlenga chhawpchhuah a nih avangin nu leh paten an fate an ṭawiawm ṭha a, hei hian inelna a ti hlu hle.