Chennaiyin an kal zel

Jeje Lalpekhlua khelhna Chennaiyin FC chuan Indian Super League champion nih an tumna kawngah kawng dik an zawh zel a, Inrinni zan khan an mikhual Pune City chu 1-0 in an hneh–he inkhela goal awmchhun hi Gregory Nelson khung a ni.

South Indian club hian table chung ber an luah nghal a, nizana inkhel Bengaluru result a zirin an dinhmun erawh la danglam leh thei a ni. Chennaiyin tan ṭum dang ang bawkin Jeje Lalpekhlua leh Jerry Lalrinzuala ten inkhel bul an ṭan a, English coach John Gregory enkawlna hnuaiah hmun pawimawh an chan chhunzawm zel.

Pune City lamah player pawimawh Lalchhuanmawia Fanai hmel hmuh tur a awm lo a, Isaac Vanmalsawma'n inkhel bul ṭan lo mah se Hnahthial tlangval hi minute 81-naah tlan luhtir a ni a, goal erawh a keng tel lo.

NorthEast United-in FC Goa an hneh hnu lawkah phur takin ATK mikhual mah se champion lai an ngam lo a, Kolkata club tan Portuguese playmaker Zequinha chuan goal awmchhun khungin 1-0 in hnehna an chang.

Highlanders tan Robert Lalthlamuana chu minute 37-naah tlan luhtir a ni a, Lalrempuia Fanai chuan bench lamah hun a hmang tluan thung. Mizote hriat hlawh player zingah I League-a Aizawl FC champion puitu Jayesh Rane chuan ATK tan inkhel bul a ṭan a, Ashutosh Mehta chu bench-ah ṭhuttir a ni thung.