Bayern tan Ribery a la tar lo

Thlasik chawlh an hman zawh hnuah Zirtawpni zan aṭangin Bundesliga khelh chhunzawm a ni a, champion lai Bayern Munich chuan Javi Martinez, Franck Ribery leh James Rodriguez te goal hmangin Bayer Leverkusen chu 3-1 in an hneh.

Bayern tan hian chawlhlawk hmain Martinez-a'n hnai set sawt aṭangin goal hmahruai a khung a, second half-ah Ribery-a'n an goal hnihna khungin mualneitu lamin Leon Bailey hmangin an siphurh an sut ṭhen. Real Madrid aṭanga loan hmanga an hawh Rodriguez chuan hun tawp hma chiahin free kick chhuih lutin an chak a nemnghet bawk.

German champion Bayern hian Hoffenheim aṭanga an lakluh thar Sandro Wagner chu hun tawp dawnah bench aṭangin an luhtir. German international hian kum 10 hnuah a club hlui a zawm leh a, goal khung nghal lo mah se hun rei lote chhungin an khingpui tlarhnung vawi hnih a chhaih buai hman.

France international hlui Ribery chuan, "Hliam nei loa ka inkhel thei hi ka lawm a, ka thil tum langsar chu Bayern Munich tana khelh zel hi a ni," a ti. Ribery hian tun season daih bak contract a nei tawh lo a, contract thar ziak turin inbiakna an nei mek.

Kum 34 mi Ribery hian 2007 khan Ligue 1 club Marseille aṭangin Allianz Arena a pan a, Bavarians tan hian Bundesliga nomawi pasarih a chawi tawh.

Jupp Heynckes-a naute hian league match 18 an khelhah point 44 hmuin hmahruaitu an nih chhunzawm a, Inrinni zan khan pahnihna RB Leipzig pawhin an mikhual Schalke chu 3-1 in an hneh ve bawk.

Leipzig tan hian nipui huna Liverpool midfielder ni mai tur Naby Keita bakah hian Timo Werner leh Tue Na Bangna ten goal an khung a, Schalke goal neih chhun hi Naldo goal a ni thung.