Match 20 hnuah West Brom chak ve ta

Premier League table mawng lama talbuai mek West Brom chuan match 20 chhung chak ni hmel an hmuh loh hnuah hnehna an chang ve leh ta. Inrinni zan legaue match khelhah defenders Jonny Evans leh Craig Dawson te goal hmangin kai thar Brighton chu 2-0 in an hneh.

West Brom tan hian ven loha awm Evans-a'n minute lina lekah corner aṭanga ball lo kal a tauh lut a, second half ṭan hnu lawkah Dawson-a'n an goal hnihna a khung bawk.

Nikum November thla khan Tony Pulis thlakin Alan Pardew-a'n Baggies a enkawl ṭan a, The Hawthorns-a hna a thawh hnuah tun ṭum hi chak ni hmel an hmuh vawi khatna a ni a, point 19 hmuin table-ah 19-na an ni.

West Brom manager Pardew chuan, "He hmunah hian Premier League match bika hnehna chan tumin kan thawkrim, team ṭha tak kan ni a, a bik takin set piece-ah khan kan hlauhawm hle a ni," tiin a sawi.

Brighton boss Chris Hughton chuan inkhel inhnehtawk takah fimkhur tawk loh vanga goal hnih an chhuah chu pawi a tih thu a sawi a, an hun ṭha neih hlah lo se la chuan point hmu thei an nih tur thu a sawi bawk.