Vawiin tlai dar 2:00-ah Aizawl FC vs East Bengal

East Bengal-in I League champion tumin Aizawl FC nomawi chawi puitu Khalid Jamil an lalut a, an player neih dan thlirin team ṭha ber ang hiala chhal theih an ni. Vawiin tlai dar 2:00-ah hian Rajiv Gandhi Stadium, Mualpuiah Kolkata club hian Aizawl FC an hmachhawn dawn a, inkhela chak zawkin champion kawng an zawh ang.

Champion kawng chu...
I League khelh mekah Minerva Punjab chu league hmahruaitu an ni a, match kua an khelh tawh aṭangin vawi sarih an chak a, Aizawl FC chiah an hneh lo. Minerva hi tun dinhmuna khel ṭha ber ni mah se an club history leh an player neih dan thlirin champion tura rin an la har a, che ṭha tluang tia sawi theih an la ni.

East Bengal erawh pahnihna ni mah se squad an nei ṭha a, champion dan thuruk hre tawh Khalid Jamil an kawl bawk avangin nomawi chawi tura la rinawm ber an ni. Mikhual tana chakna harsatna hmun RG Stadium-a hnehna an chan theih chuan Minerva chunga awm pawh an harsat lo ang.

Aizawl FC pawh table-ah pasarihna ni mah se match hnihin an la khel tlem a, Minerva nena an inthlauhna point kua hi khelh zat inangah point thum leka la sawr zim theih a ni a, team pahnih hi an la inhmachhawn dawn bawk. Mizo club tan tun hi champion kawng zawh theihna hun ṭha a ni a, East Bengal hneh hi point thum satliah a ni lo. AFC-in hnehna an chang a nih chuan Kolkata club-in point thum an hloh tih hriat tel a ṭha a, East Bengal hmabakah Kolkata Derby a awm avangin Red and Gold hian club dang aiin pressure an ngah zawk.

En châkawm
East Bengal ringawt hi Rajiv Gandhi Stadium panna tham a ni a, club enkawltu Khalid Jamil-a chhut tel phei chuan Mizo zingah chuan Kolkata club hi tla na tur a ni a, ṭum dang zawng aiin inkhel entu pawh an tam ang - tun season chu entu an ṭha vak lo.

Khelmual chhungah pawh season liam taa Aizawl FC game mawitu Mahmoud Al Amna a rawn tel dawn a, Syrian midfielder hian football mawina a pho chhuak ṭhin. Aizawl FC-in Amna thlak nan Europe-a sulhnu nei tawh Andrei Ionescu an lalut thung a, vawiin hi player ṭha pahnih khaikhin theihna hun ṭha a ni.

Romanian midfielder Andrei chuan, "Amna hian Aizawl FC tan sulhnu ṭha tak a nei thei a, ka tan buaina tur a awm lo. Ka game pangngai angin ṭha takin khelh ka tum dawn a, ani pawh ṭha taka khel turin ka duhsak a ni," tiin pressure a neih loh thu a sawi.

East Bengal hian Mizo trio Lalramchullova, R. Laldanmawia leh Brandon VL Remdika te an rawn hruai vek a, Khalid-a'n heng player pathum a chhawr dan tur tichiang lo mah se Mizo club leh RG Stadium hre bel player hlutna erawh a hre chiang dawn.

Kolkata club hian Aizawl FC chauh an rawk lo a, an hmelma Mohun Bagan lak aṭangin midfielder Yusa Katsumi leh defender Eduardo Soares Ferreira an lalut. An foreigner zinga hraw bera chhal theih Willis Plaza an chelh thei a, midfield tichak turin Ivorian midfielder Bazie Armand an la thar bawk.

Aizawl FC tana thu lawmawm erawh East Bengal hian an player thar Nigerian striker Dudu Omagbemi chu document a la tihfel hman loh avangin Aizawlah an hruai tel lo. Chutihrualin vawi khatah foreigner panga bak a luhtir theih chuang lo a, Khalid-a'n vawi khata chhawr theih zat player a kawl, Mizo club tan pawh fimkhur a ṭul ang.

Mizo club hi
Aizawl FC-in Salt Lake Stadium-ah East Bengal an hmachhawn tawh a, goal hnih an chhuah hmasak hnuah sut leh hramin season ṭan nan point khat hlu tak an hlawh chhuak. Amaherawhchu he inkhelah hian Romanian midfielder Andrei chu hliam vangin a inlan lo a, Mizoram Premier League semifinal an khelh kawp bawk avangin inpuahchahna hun an nei ṭha tawk lo.

Portuguese coach Paulo Meneses chuan, "East Bengal nena kan inkhelh ṭum ai khan kan ṭha tawh zawk a, team pawh kan inrem khawm fuh tawh zawk. Kei ni hi champion lai kan nia, Kolkata club lakah hian defensive game kan khel dawn lo - attacking game kan khel dawn. Aizawl FC khelh dan hi season tir

aṭanga in lo thlir chuan attacking game kan khel ṭhin tih in hria ang," tiin defensive game an khelh loh tur thu a sawi.

Mizo club hian an match hnuhnung ber Inrinni khan an khel chauh a, Chennai City 2-0 a an hneh hnuah hahdamna hun ṭha an nei lo. AFC boss Paulo chuan, "Rilru hi a pawimawh. Player chu an chau thei; amaherawhchu kan rilru a inpeih chuan ṭha takin kan khel thei ang. Player dinhmun kan zir ang a, chumi mil chuan player kan thlang dawn," tiin a sawi.

Chennai City an hneh ṭuma hero of the match-a thlan David Lalrinmuana chu inhliam vangin a dinhmun a chiang lo a, Zemabawk North tlangval hian khelhna hun ṭha a neih phawt chuan season liam taa amah chhawr ṭha duh lotu, a khelh phak lohna East Bengal lakah a ṭha thei ang bera khelh a duh ang.