Number 1 Nadal a chak chiang

Rafael Nadal chuan nimin tlai khan Australian Open first round-ah world number 79 Victor Estrella Burgos a hmachhawn a, world number 1 Nadal hian darkar khat leh minute 34 chhung lekin 6-1, 6-1, 6-1 in hnehna a chang.

Rod Laver Arena-a inkhelah Grand Slam vawi 16 champion tawh Nadal hian a tir aṭanga a tawp thlengin inkhel a thunun tluan chhuak zak. Set hmasa ber la turin minute 23 chiah a mamawh a, set hnihnaah pawh a bul ṭan nan a khingpui Estrella Burgos service chhuhsak nghalin harsatna a tawk zui lo.

Kum 37 mi Estrella Burgos-a'n Nadal aiin tharum a hmang na thei lo zawk a, set khat tal lak tumin a theih tawpin ball vir hmangin Nadal bei mah se Spain tlangval a chesual duh lo. Set tinah Nadal hian game khat ṭheuh chiah a hloh a, dinhmun hlauhthawnawmah a ding miah lo a ni.

Season hmasa khan Nadal hian Grand Slam nomawi pahnih a chawi a, major tournament hmasa ber Australian Open-ah pawh final a lut; mahse nomawi inchuhna inkhelah Roger Federer a hneh lo, kuminah Swiss thiampuipa Federer nen hian an chak chho zel a nih chuan final-ah an intawng leh ang.

Nimin mipa singles inkhel dangah seeded parukna Marin Cilic pawhin set li an khelh hnuah Vasek Pospisil chu 6-2, 6-2, 4-6, 7-6 (7/5) in a hneh bawk. US Open champion hlui Cilic hian Melbourne Park-ah second round vawi kua a luhna chiah a ni a, a thlen san ber ṭum chu kum 2010 kha niin semifinal-ah Andy Murray a hneh lo.

Kum 29 mi Cilic hian season hmasa kha a hmang ṭha hle, French Open quarterfinal a luh bakah Wimbledon final a khel a, world number 4 niin ranking lama a tawn san ber ṭum a thleng - kuminah season dang aiin beiseina a nei sang ang.