Manchester pan tur Alexis Sanchez?

Arsenal forward Alexis Sanchez-a'n Premier League hmahruaitu Manchester City pan a duh a, mahse tun dinhmunah chuan Manchester United nen an inhnaih zawk a, he thu hi chhiar meuh chuan a kalna lam a chiang thei tawh bawk.

Arsene Wenger-a'n a player pawimawh Sanchez hi Chelsea nen an inkhelh ṭumin bench-ah a ṭhutir a, Pathianni zana Bournemouth an hmachhawn ṭumin squad-ah a telh lo a, 1-2 in an chak lo. Inkhelh banah Wenger chuan, "Darkar 48 hnuah a hma hun a chiang ang," tiin Sanchez chungchang a sawi.

Kum 29 mi Sanchez hian tun season tawp thleng daih bak Arsenal tan contract a nei tawh lo, a pawhsei duh loh avangin man neia a chhuah theih hun hnuhnung a hmang mek. Manchester club pahnih bakah sum ngah Paris St-Germain pawh sawi rik an ni.

Gunners manager Wenger chuan, "A boruak tak hi ka sawi thiam chiah tawh lo, vawiinah emaw naktukah emaw pawh a ni thei, a nih loh pawhin engtik niah mah a ni lo thei bawk. Darkar 48 chhungin a chiang ang," tiin Pathianni zan khan a sawi, Sanchez hma hun a chiang thuai dawn.

North London club hian an forward manah hian pound maktaduai 35 zet an la phut nia sawi a ni a, hei hi City lam chuan to an ti. Man United lam erawhin Chile international an lakluh theihna tur a nih chuan hetiang zat sen hi an inhuam thung.

Man United manager Jose Mourinho chuan, "Sanchez hi player ṭha danglam bik a ni. Player ṭha bik an awm a, chung zinga mi chu season laklawh laia lak theih an nih chuan kan bei tur a ni," tiin Arsenal forward an beisei thu a sawi.

Arsenal hian Sanchez thlaktu tur an melh nghal der tawh, French Ligue 1 club Bordeaux forward Malcom chu lakluh an tum nia sawi a awm leh der tawh. Nipui lai khan AS Monaco aṭanga France midfielder Thomas Lemar an lak theih loh vang chauhin Sanchez hi an chelh a, a thlakna tur nei lo chuan hralh ngawt chu an duh lo tih a hriat theih.

Champions League khel phak lo Arsenal hi Premier League table-ah parukna an ni mek a, palina Chelsea aiin point riatin an hniam zawk avangin season tharah pawh Europe-a club football inelna sang ber hi an khelh a rinawm loh a, Sanchez an chhuah phei chuan Europa League khel turin an beih fe a ṭul dawn tih a lang.

Chilean forward Sanchez bakah Mesut Ozil chu season tawp rualin a contract a tawp dawn a, player ṭha pahnih tel loin Arsenal hian Premier League club naran Bournemouth an hneh lo. Gunners ṭantuten season ṭan hmain Arsene Wenger-a chhuak turin an duh a, Cherries an hneh loh hnuah 'Wenger Out' chu football ṭawngkam lar a ni leh ta.

Bournemouth an hneh loh hnuah Wenger insawifiahin, "Goal kan khung a, a hnuah kan tihsual vangin vawi hnih kan lamah a lut zui. Tihsual kan ngah a, kan tuar a ni," a ti.

French manager insawifiahna hian Arsenal ṭantute a tihlawm zawh a rinawm tawh lo a, tun dinhmunah chuan Sanchez chauh ni loin Ozil bakah manager Wenger thlengin an hmalam hun a chiang ta lo.