Anfield-ah City an zawr

Match 22 chhung tlawm hmel an hmuh tawh loh hnuah Manchester City an tlawm ve ta - Pep Guardiola leh a hote ngamtu hi Liverpool an ni.

Jurgen Klopp-a naute hian 4-3 in an mikhual team hi an lo hneh. Man City hian match 18 chhung chu a zawnin Anfield-ah chak hmel an hmu tawh lo.

Liverpool-in pound makta­duai 142-a Philippe Coutinho an hralh hnuah Brazilian play­maker tel loin an la ṭha tawk tih an pholang.

Alex Oxlade-Chamberlain, Roberto Firmino, Sadio Mane leh Moha­med Salah ten goal khat ṭheuh an khung - tlarhnungah Virgil van Dijk a la awm lo mah mah! Reds boss Jurgen Klopp chuan, "Coutinho tel lo pawhin kan ṭha tawk tih pholanna a ni," a ti.

Mangṭha Coutinho
Liverpool fan-ten City nena an inkhel an thlir kir chuan hman ni lawka ui taka Coutinho mangṭha phal lo tute pawh khan hlim takin mangṭhana kut an phar chhuak thei tawh ang a, Brazil international tel loin goal an khung thei tih an hmuh avangin Coutinho an ngai lo ang.

Klopp-a hnuaiah Coutinho kha Reds attacking game-a an khaipa ber a ni ṭhin a, goal chance siamtu a ni a, goal khungtu a ni bawk. Mahse, Barcelona player thar awm loh hnuah Oxlade-Chamberlain chu Klopp-a'n inkhel bul a ṭan tir a, Ox hian Coutinho pheikhawk hnutchhiah inthawlh turin theihna a nei tih a pholang nghal - minute kuana lekah goal khung rem lo tak nia lang aṭangin kawh zetin goal hmahruai a khung.

The Fab Four?
Coutinho chhuah vangin Fabulous Four a tawp ta nia ngaitute chuan an ngai sual ang - Ox a awm tawh a, Firmino, Mane leh Salah te lahin an thiam thil an theihnghilh thut lo.

City tan Leroy Sane-a'n box chhunga ball lalutin an si phurh sut mah se second half-ah Liverpool attacking football hmuhnawm kan hmu - player khel ṭha zingah Emre Can leh Andrew Robertson hming lam hmaih a thiang lo.

Firmino-a'n John Stones defending chhiat zarzoin Reds hma a hruaipui leh a, post pet pertu Mane a vanduai reng bik lo, an goal thumna a khung ve leh bawk - City-in an tihsual bawk an tuar leh a, goalkeeper Ederson ball petchhuah chhe tak zarzoin Salah chuan an goal lina a khung.

Mahse, hun tawp hnaih lamah ṭum dang ang bawkin Reds tlarhnung pherh a langsar, Bernardo Silva leh Ilkay Gundogan ten City tan si phurh an sut ṭhen - goal dang lut tur erawhin hunin a daih tawh lo.

Klopp-a hlim
Liverpool manager Jurgen Klopp chuan, "Football mana­ger emaw football fan nihna angin kha inkhel kha thlir theih a ni a, football fan anga en ka duh zawk! Game ropui tak a ni a, team hmuhnawm pahnih, an theihna zawng zawnga inkhel kan hmu a ni. City hi tun season-ah hei bak hi an tlawm tawh kher lo mai thei a, heivang tak hian kum 20 liam hnuah pawh he match hi chuan sawi a la hlawh ang," a ti.

Klopp chun sawi chhun­zawmin, "Khawvel hmun hrang hrangah zanin kan inkhel kha an en a, kha vang tak khan kan theihna tawpa khelh kha a ngai lehzual a ni. Hun tawp hnaih lamah City-in goal rawn khung mah se hlauhthawnna nei miah loin ka awm a, ka naute ka hrechiang tawk a ni. I theihnaah i thinlung i pe tel a nih chuan hetiang game ropui hi in hmu ang," tiin a naute chuan an theihna zawng zawnga an khelh thu a sawi.

Reds faktu Pep
City boss Guardiola chuan, "Liverpool ka lawmpui a ni. 1-1 a kan inhnehtawk lai kha chuan game kha kan kutah a la awm a, mah se kan finishing ṭhat tawk loh avangin 4-1 a ni ta thut a ni ber. Goal i chhuah tawh chuan i fimkhur tur a ni a, mah se chutiang chuan kan ti lo. Season tluan chuan hetiang hi thleng ve tur reng a ni," a ti.

Pep chuan, "Kan chak lo a, mah se Newcastle nen kan inkhelh leh hmain insiamṭha turin kar khat vel hun kan la nei. Tuna kan tih theih chu Liverpool fak hi a ni mai. Jurgen Klopp-a enkawl team tum hautak zia kan hria a, a bik takin Anfield-ah a harsa lehzual. Premier League press conference apiangin champion tawh anga min ngaih thu an sawi ṭhin a, mah se engmah a la tawp lo tih zanin khan a nemnghet a ni," tiin an khingpui team a fak.