Premier Badminton League : Rankireddy telna Hyderabad an champion

Premier Badminton League vawi lina chu Pathianni zan khan Gachibowli Indoor Stadium, Hyderabad-ah khelh zawh a ni a, Hyderabad Hunters chuan Bengaluru Blasters 4-3 in an hneh.

PBL-ah match nga hmangin chak zawk zawn a ni a, Hunters leh Blasters te match li khelh zawhah 3-3 in an inhnehtawk. Mixed doubles hmangin chak zawk zawn a ni a, kum 17 mi Sat­wiksairaj Rankireddy leh Indo­nesian shuttler Pia Zebadiah Bernadeth te inkawp chuan Bengaluru aiawh Kim Sa Rang (Korea) leh N Sikki Reddy (India) te ṭangdun chu 15-11, 15-12 in an hneh a, Hyderabad an champion.

Tu nge Rankireddy?
Andhra Pradesh tlangval Rankireddy hi August 13, 2000-a piang a ni a, doubles specialist niin a kum phu loin sulhnu pawh a nei ṭha tawh. Rankireddy hi men's doubles ranking-ah 28-na a ni phak a, mixed doubles-ah 64-na a ni a, kum 17 chauha a upa a ni tih hriat tel a ṭha bawk.

PBL final-ah hian feet ruka sang Rankireddy hian a sanna hmang ṭangkaiin a stroke na tak chu an khingpui Kim leh Sikki Reddy te tan a harsa a, inkhel thunun chungin straight set-in hnehna an chang.

Final chu
League round hnuhnung berah Hyderabad hian Bengaluru hi match ngaah hneh vekin point ruk an hmu a, trump match-ah pawh chak lo Blasters hian -1 chauh an hmu. Amaherawhchu, hemi ṭum hian Bengaluru-in an thiampuipa world number 1 Victor Axelsen an dah ṭha.

Final-ah erawh Mathias Boe leh Kim Sa-rang te Bengaluru chu an chak pui nghal a, Hyderabad aiawh Markis Kido leh Yoo Yeon-seong te chu match pawimawh 15-9, 15-10 in an chak lo.

Hyderabad lamin trump match atan Lee Hyun-II an chhawp chhuak a, Subhankar Dey a hneh nawn a, 1-1 a ni. Singles-ah world number 1 Axelsen a inlan a, Indian star Sai Praneeth tan chelh zawh rual a ni lo a, Bengaluru lamin 2-1 in hma an hruai nawn.

Bengaluru tan match khat chauh chak ngai tawh mah se Hyderabad lamin Carolina Marin an nei a, world number 1 hlui hi Kirsty Gilmour tan hneh rual a ni lo. Scottish shuttler Gilmour hi an intawn hmasak ṭum aiin insiamṭha viau mah se 8-15, 14-15 in an chak lo.

A tawpah mixed doubles chu chak zawk zawnna a ni a, he inkhel hi kum 17 mi Rankireddy-a'n hming chher nan a hmang a, Hyderabad lawmna a siam sak.

Thlir let ila
Hyderabad hian final thleng turin Delhi Dashers chu 3-0 in an hneh a, league round-ah pakhat­na an ni. PBL hmasa berah khan Hyderabad hming pu tho Hyderabad Hotshots an lo champion tawh bawk. Bengaluru hi league round-ah palina an ni hram a, semifinal-ah Ahmedabad Smash Masters 3-2 in an hneh.

Tun ṭum hi PBL hi a vawi lina a ni a, nikum kumtir khan Chennai Smashers chu pakhatna an ni a, champion pahnihna chu Delhi Acers an ni.