Suarez goal hnih hmangin Barca an comeback

Real Sociedad khelmualah 2-0 in Barcelona tlawm hman mah se team ṭha zia pholangin comeback ropui an lantir a, 4-2 a an khingpui team hi lehthalin La Liga-a an hmahruaina an chhawm nung zel.

Barca tan Lionel Messi-a'n goal khungin a club tan league goal 366 a khung tling ta a, Bayern Munich legend Gerd Muller khumin club mal tana league goal khung hnem ber a ni ta.

Chawlhlawk hman a nihin Barce-lona hi 2-1 in an la chak lo zawk a, Catalan club tlawm changtute hlimin an nui. Mahse, second half-ah Barca-in an club zia tak tak an pholang a, Luis Suarez chuan a zawna match ruk chhung goal a khungna ni tura goal hnih khungin Barca a 'comeback' pui.

Rin loh lam...
Real Sociedad khelmualah rin loh takin mualneitu team-in goal an khung hmasa zawk a, Willian Jose chuan minute 11-naah Barca a barakhaih. Brazilian striker hian goal khat dang khung zui mah se hei erawh pawm sak a ni lo. Sociedad an talbuai phah lo–minute 34-naah Juanmi chuan an hmahruaina goal a khung chhunzawm a, Barca fans thawm a reh.

Minute 39-naah Barcelona-in an si phurh an sut ṭhen a, goal khungtu hi Paulinho a ni–Brazilian midfielder goal khung hi Luis Suarez siamsak a ni a, kum 29 mi midfielder hian Barcelona tan league-ah goal riat a khung sak tawh–Guangzhou Evergrande aṭanga pound maktaduai 36.4-a Catalan club a zawm tirha fiamthu nana hmang tute thawm a reh ta.

Hei le Suarez...
Chawlhlawk hman a nih hnuah Barcelona-in si khat an la phur tih inhre chungin chak ngei tumin an khel a, Suarez a inlar nghal–Liverpool striker hlui hian minute 50-naah an si phurh sut zawhna goal mawi zet a khung a, a bak zawng hi chu Barcelona ta a ni tawh.

Minute 71-na a ni a, Uruguay international Suarez bawk inlarin Thomas Vermaelen hnen aṭanga a ball hmuh chu an hmahruaina goal ni turin a khung a, Barca an chak leh ngei dawn tih a chiang–minute 85-naah goal khung loa awm thiam tawh lo Lionel Messi hun a inher ve zui a, Argentine striker hian chak nemngheh nan freekick aṭangin nalh zetin a khung.

Bye bye Madrid
Barcelona-in hnehna an chan leh tak avangin La Liga-ah hma an hruai chhunzawm zel a, an hmelma kumhlun leh palina dinhmun luah mektu Real Madrid aia an san zawkna chu point 19 zet a ni tawh–1990-91 season hnua Barca-in heti zat point a Real an tlansan leh theihna hmasa ber a ni. Zinedine Zidane-a naute tan chuan nomawi humhim ai chuan Champions League khelh phak chu season thar atan 'tum awm zawk' a ni tawh.

Catalan club hian league match 19 an khelh tawhah tlawm hmel an la hmu miah lo bawk a, Pathianni zanah Manchester City-in Liverpool an ngam loh bawk avangin Europe-a league sang pangaa club zingah tlawm hmel la hmu lo awmchhun an ni tawh–pahnihna Atletico Madrid aia point kua laia an san bawk avangin Barca tan champion a hnai zel.

Ala tawp lo
Chhiarkawp thiam lo tan pawh Real Madrid tan La Liga nomawi beisei chi a ni tawh lo tih a chiang a, mah se football a nih miau avangin Barca coach Ernesto Valverde ngaihdan erawh a dang thung. Spanish manager chuan, "Real Madrid hian table-a an dinhmun chu an hre ve reng ang a, mah se hei hi tlawm nan an hman ka ring lo. La Liga team-ah hian tumah an la tlawm lo," a ti.

Valverde chuan sawi chhunzawmin, "Atletico Madrid, Valencia leh Real te hian kan inkar zau tak hi a la tihzim theih tih an hre vek a ni. A tawp thlengin kan bei dawn a, team dang pawh chu chu an rilru puthmang a ni ve tho a ni," tiin a ṭawng pawr duh lo.

Inkhel Result

Levante 0–1 Celta de Vigo

Deportivo Alavés 1–0 Sevilla

Espanyol 1–1 Athletic Bilbao

Real Sociedad 2–4 Barcelona