PSG tan Di Maria goal a tawk

Paris St Germain chuan tun hnai kum ruk chhunga a vawi nga nan French Ligue 1 nomawi chawi an tumna kawngah hmalam panin an kal zel. Pathianni zan inkhelah PSG hian Angel Di Maria goal khat hmangin Nantes chu si khat faiin an hneh.

Argentine winger Di Maria hian minute 12-naah Edinson Cavani siamsak chu goal awmchhun ni turin a khung. PSG tan hliam vangin Neymar leh Thiago Motta te an inlan thei lo a, mah se training a zawm tlai vanga match hnih an khelhtir loh Cavani a inlan theih tawh thung avangin tlarhmaah an buai lo.

Unai Emery naute hian match 20 khelhah point 53 hmuin hmahruaitu an nih chhunzawm zel a, champion lai AS Monaco chu pahnihnaah awmin point 42 an hmu thung–pathumna chu Lyon an ni. Claudio Ranieri enkawl Nantes hi pangana an ni thung a ni.

Nantes defender Diego Carlos chu hun tawp dawnah yellow card vawi hnihna pek a nih avangin hnawhchhuah a ni. Replay en a nih hnuah Carlos hian tihsual a nei lo niin a lang. Referee Tony Chapron thutlukna hi Nantes chairman Waldemar Kita chuan awm lo a tih thu a sawi a, "Chapron kha a thiltih avang khan thla ruk chhung hrem awm zawk a ni," ti hialin a sawi.