Venus leh Stephens an tla nghal

Australian Open khelh ṭan niah beisei loh result kan hmu. Grand Slam vawi sarih champion tawh Venus Williams leh US Open champion lai Sloane Stephens te an chak lo nghal.

Nimin Melbourne Park-a inkhelah seeded pawh chang phak lo, world number 78 Belinda Bencic chuan Venus lakah darkar khat leh minute 55 chhungin 6-3, 7-5 in hnehna a chang.

Kum 20 mi Bencic hi player beiseiawm tak a ni ṭhin, kum 18 chauh a nih laiin ranking lamah pawh a sang 10 zingah a inhlangkai thei. Mahse, a banrek hliam vangin buaina a tawk chho a, nikum November thla khan world number 318-naah a tla hniam.

A hliam dam hnuah hma a sawn chho a, tun hnaiah a zawnin match 16 a chak tawh. Bencic chuan, "Venus lakah hian vawi li ka tlawm tawh a, tun ṭumah chuan ka theihna zawng zawnga ka khelh hnuah a vannei zawkah ka ṭang," tiin a sawi.

Kum 37 mi Venus hian nikum khan Australian Open leh Wimbledon final a khel a, US Open-ah pawh semifinal a thleng. Tun season-ah erawh Grand Slam hmasa berah hneh nei loin a tla.

Stephens a tla
Hmeichhe singles inkhel dangah US Open champion Sloane Stephens chu China nula Zhang Shuai lakah a tlawm. darkar khat leh minute 58 an inkhelh hnuah world number 34 Zhang hi 2-6, 7-6 (7-2), 6-2 in a chak.

World number 13 Stephens hian set hnuhnung bera 5-4 a hma a hruai laiin a service a, mah se a hum thei lo. Tie break khelh zui niin Zhang a ding tlang.

Kum 24 mi Stephens chuan, "Thil ṭha lam ka ngaihtuah a ngai a, a rang thei ang berin court chhungah a ṭha thei anga inlan leh thuai ka tum ang," a ti.

Rod Laver Arena-a inkhel dangah French Open champion Jelena Ostapenko chuan Italy nula Francesca Schiavone chu 6-1, 6-4 in a hneh a, seeded 12-na Julia Gorges pawhin tun hnaia match 15 a chak zawn tawhna chhawm nung turin 6-4, 6-4 in Sofia Kenin a hneh bawk.