Anderson lakah Edmund a chungnung

Nimin aṭang khan Australian Open chu Melbourne Park-ah khelh ṭan a ni a, mipa player langsar zinga mi Kevin Anderson chu Kyle Edmund lakah a chak lo nghal.

Britain tlangval Edmund hian inkhel inhnehtawk takah 6-7 (4-7), 6-3, 3-6, 6-3, 6-4 in seeded 11-na ni phak Anderson lakah hnehna a chang. Kum 23 mi Edmund hian set hnih a hloh hmasak hnuah set hnih a la let thei a, set thumna an khelh lai pawhin 2-0 in an hnufual, darkar li zet an inkhelh hnuah a vannei zawkah a ṭang.

World number 49 Edmund hian Grand Slam bikah player langsar a hneh ngai meuh lo. 2016 US Open khan seeded 15-na Richard Gasquet a hneh tawh a, hemi hnuah US Open finalsit Anderson hi seeded sang player a hneh lehna chiah a ni–nikum French Open khan a ngam lo a, tunah phuba a la chiah; second round-ah chuan Denis Istomin a hmachhawn leh ang.

Mipa singles inkhel dangah seeded pathumna Grigor Dimitrov chuan Dennis Novak chu 6-3, 6-2, 6-1 in a hneh bawk. Dimitrov hian nikum November thla khan ATP World Tour Finals nomawi a chawi a, season bul pawh a ṭan ṭha chho hle. Rod Laver Arena-a a match hmasa berah hian game ruk chiah a hlauh a ni.

Kum 26 mi Dimitrov chuan, "Grand Slam nomawi chawi ka duh a, mahse tunah chuan champion sawi hun a la ni lo. Match khelh hmabak pakhat chauh zel ngaihtuah a ngai," tiin a sawi.