Coronavirus vangin NBA chawl

Tunlai hrileng coronavirus vangin National Basketball Association-in thu thar awm leh hma an chawlh thu an puang. Nimin zing thleng khan NBA match khelh a ni a, Utah Jazz player zinga coronavirus vei an awm avangin thutlukna hi an siam.

Nimin zing khan Utah Jazz leh Oklahoma City te chu inkhel tur an ni a, Chesapeake Energy Arena-ah mipui pung khawm vek tawhin player pawh an ko chhuak tawh. Amaherawhchu Utah center Rudy Gobert-a'n coronavirus a vei tih hmuhchhuah a nih avangin inkhelh an ṭhulh.

Arena-a thupuangtu chuan, "Hriat lawk loh thil thleng avangin inkhelh hun sawn a ni a, entute erawh inhim," tiin a puang a. NBA chuan arena-ah hian coronavirus vei player hi an awm loh thu an sawi. New Orleans Pelicans leh Sacramento Kings inkhel tur pawh Pelicans player-te'n dressing room an chhuahsan duh loh avangin inkhelh hun an sawn. Referee tur Courtney Kirkland chuan Thawhlehni zing khan Jazz leh Toronto Raptors inkhel a kaihruai a, hetah hian coronavirus vei tih an hmuhchhuah Rudy Gobert a inlan avangin Pelicans hian an khel ngam lo.

Raptors pawhin Utah Jazz hmachhawn an player-te chu ni 14 chhung inkhung hrang turin an hriattir a. NBA pawhin inkhelh chawlhtir a rel chhan hi coronavirus darh zel tur ven nan a ni. Los Angeles Lakers star LeBron James chuan coronavirus vanga entu mipui awm phal loh a nih chuan inkhelh loh a duh thu a sawi a, hemi hnu hian ngaihtuah nawn lehin, "Mipui tel loa inkhelh hi hriatthiam a harsa, chutihrualin mi thiamte thlirna a zirin khelh a ṭul chuan ka pawm ang," a ti leh ta tho.

Nimin lama NBA-in chawlh a nih tur thu thuchhuah an siam hnuah LeBron chuan, "School, office, hna hrang hrang leh thil tih khawm pawh ṭhulh a ni ta zel. Kum 2020 tawp hi paih bo theih ni se ka va ti em. Thla thum chhung hun harsa tak kan tawng a, Pathian awmpuina leh malsawmna kan mamawh a ni," tiin a sawi.

NBA hian January 26, Pathianni khan basketball legend Kobe Bryant chu helicopter chesual vangin an chan a, tunah coronavirus vangin inkhel chawlh a ṭul. Tun dinhmunah NBA kal zel dan tur a la hriat loh a, coronavirus laka mipui an him hnuah chauh khelh ṭan leh a ni ang.

NBA khelh mekah hian season chawhnu lam khelh chhoh a ni tawh a, regular season-a match 82 khelh turah a khel tlem ber pawhin match 63 an khel tawh. Nikum NBA finalist Golden State Warriors-in player inhliam an tuar a, match 17 khelh tur a la awm chungin playoff an khel thei dawn lo. 

Eastern Conference aṭangin Milwaukee Bucks, Toronto Raptors leh Boston Celtics te playoff khel turin an tling tawh a, Western Conference aṭangin Los Angeles Lakers khel turin an tling tawh bawk.