Aizawl FC leh East Bengal inkhel boruak a sang

Nimin tlai I League inkhel pawimawh takah Aizawl FC leh East Bengal te goal awm loin an inhnehtawk a, inkhelh ṭan hma aṭanga a tawp thlengin inkhel boruak a sang. Mizo club hian tun Inrinni hian Neroca an mikhual dawn a, I League club thar hi Manipur club an nih avangin inkhel entu an ṭhahnem ang.

Aizawl FC-in match riat aṭangin point 14 an hmu a, table-ah palinaah an invawrh chho. East Bengal erawh match 10 aṭangin point 19 an hmu a, anmahni aia match khata khel tlem Minerva Punjab point thumin an pha lo.

Red and Gold coach Khalid Jamil-a'n a club hlui AFC-in an chhuahtir tia a sawi avangin Mizo club ṭantute an thinrim a, hei hian inkhel boruak a tihnun phah.

David-a tel lo
Aizawl FC-in Chennai City an hneh ṭuma goal khungtu David Lalrinmuana chu inhliam vangin squad-ah dah a ni lo a. Zemabawk North tlangval aiah Hmingthanmawia (Valpuia) chu luhtir a ni a, Valpuia hi defender anga hriat ni mah se I League-ah chuan defensive midfield anga chhawr a ni.

Japanese forward Yugo Kobayashi aiah Leonce Dodoz chu foreigner zinga hmatawng tura thlan a ni. Dodoz hian mual sirah S. Malsawmtluanga a thlak a, Yugo hmunah hian William Lalnunfela a awm thung.

Bench-ah Plaza
East Bengal-in an striker neih hriam ber Willis Deon Plaza chu bench-ah an dah a, foreigner pali dang an inlan vek.

Aizawl FC playmaker hlui Mahmoud Al Amna-a'n bul a ṭan a, Mizo tlangval pahnih R. Laldanmawia leh Lalramchulova te chu mual dinglamah an awm a. Brandon VL Remdika erawh bench aṭangin bul a ṭan mah se minute 23-na lekah a rawn inlan nghal.

I League-ah Under 22 player starting eleven-ah dah ngei ngei a ngai a, Brandon aia Prakash Sarkar luh chhan hi kum 22 hnuai lam a nih vang a ni.

Inkhel a nung
Aizawl FC coach Paulo Meneses-a'n attacking football an khelh tur thu a sawi lawk a, minute lina lekah Andre Inonescu freekick chu Kareem Omolaja chuan tauh pialin East Bengal defender Chullova'n goalline aṭangin a pet chhuak.

Alfred Kemah Jaryan chu dah hma hret a ni a, Mizo club captain hian box pawn aṭangin kawh zetin ṭum hnih a pet a, a pet hmasak zawk chu goal zawnah a kal lo a, a vawi hnihna erawh keeper Luis Xavier Barreto-a'n a dang ṭha tak zet.

Chance ṭha ber erawh minute 16-naah thlengin AFC-in counter attack hmangin an vaw let a, R. Laldinliana leh Albert Zohmingmawia ten ding lam aṭangin East Bengal tlarhnung an ṭhiat a, William Lalnunfela'n hnai tak aṭangin a tawp a khar thei lo.

Mikhual team lamin freekick an hmang ṭangkai a, East Bengal midfielder Katsumi Yusa chuan goal ban a pet per a, hemi per hi chang fuh lehin Japanese midfielder hian goal zawnah pet nawn mah se keeper Avilash-a'n a dang nawn.

MPL best player hmasa ber Danmawia chu AFC tlarhnung tan ven a ṭul a, Sialhawk tlangval hian goal a keng tel lo. Red and Gold midfielder Al Amna a la thiam reng a, amaherawhchu chawm tur ber Willis Plaza a inlan loh avangin Syrian midfielder a hlauhawm tawk lo.

A tawp a hmuhnawm
East Bengal midfielder Bazie Armand a len ṭhat avangin Aizawl FC tlarhma lamin paltlang an harsat a, Khalid Jamil-a'n mikhual tana RG Stadium-a point hmuh harsat zia a hriat avangin Willis Deon Plaza pawh hun tawp lam minute riat chiah a chhawr ngam.

Red and Gold hian chance mumal an insiam thei lo a, box pawn aṭanga Brandon-a ball pet erawh AFC keeper Avilash-a'n a dang ṭha hle. Aizawl FC lamin second half-ah chance ṭha an nei bik lo a, penalty area-ah Romanian midfielder Andre titlu mah se penalty pek a ni lo.

Paulo Meneses-a'n chak tumin Lalkhawpuimawia a dah lut a, Kelkang tlangval hian I League a khelh hmasak berah chakna goal khung theihna hun ṭha a bawhpelh a, goal inpe loin team pahnih an ṭin.