Champion lai Federer chak nuamsa

Grand Slam vawi 19 champion tawh Roger Federer chuan Australian Open nomawi a kawl lai humhim turin bul a ṭan fuh hle. Nimin chawnu khan Federer hian Aljaz Bedene chu 6-3, 6-4, 6-1 a hnehin second round a inhlangkai.

Swiss star Federer hian hnehna chang turin minute 99 chiah a mamawh, kum 36 mi ni tawh mah se a vawi ruk nana champion tura rinkai a ni phak chiang hle; Ningani hian a match lehpek atan Jan-Lennard Struff a hmachhawn leh ang.

Australian Open vawi nga champion tawh Federer-a'n a match hmasa berah hian winners vawi 41 zet a vaw chhuak thei a, a khingpui Bedene erawhin Melbourne Park-ah match nga a khelh tawhah hnehna a la chang ngai miah lo.

Kuminah Federer hi seeded pahnihna a ni a, pakhatna leh season hmasa finalist ni bawk Rafael Nadal bakah Novak Djokovic leh Stan Wawrinka te chu a lallukhum chuh buai phak tura ngaih an ni.

Season hmasa chhunga Grand Slam vawi hnih champion Federer chuan, "Nikum ang bawkin kum duhawm ka hman leh ngei ka beisei. A awlsam dawng nge harsa zual dawn tih chu ka la hre lo, Rafa a khel ṭha hle a, player dang pawh an hliam a dam tawh," tiin a sawi.

Nimin match dangah Australian Open nomawi chawi tawh Stan Wawrinka chuan Ricardas Berankis chu 6-3, 6-4, 2-6, 7-6 (7-2) in a hneh ve bawk. Season hmasa semifinalist Wawrinka hian hliam a neih avangin inbuatsaih lawkna tournament khel miah loin Australian Open a khel a, set khat hloh mah se hnehna a chan avangin a tan bul ṭanna chhia tia sawi tur a ni lo.

Player beiseiawm ni phak zingah seeded 22-na Milos Raonic chu world number 86 Lukas Lacko lakah 6-7 (5-7), 7-5, 6-4, 7-6 (7-4) in a chak lo nghal. Canadian Raonic a chawn hliam vangin season hmasa khan a buai a, chumi hnuah a ban rek zai a nih zui avangin beisei angin a la khel chhuak leh thei rih lo a ni.