Wales coach thar Giggs

Manchester United legend Ryan Giggs chu Thawhṭanni khan Wales manager tura lakluh a ni a, kum li daih contract a ziak.

Kum 44 mi Giggs hian November thlaa Sunderland pan ta Chris Coleman a thlak. Wales manager hna chelh tur hian Coleman-a assistant Osian Roberts, Wales striker hlui Craig Bellamy leh Mark Bowen te biak an ni bawk a, United player hlui Giggs an thlang ta a ni.

Wales-in 2018 World Cup an tlin zawh tak loah khan Football Association of Wales (FAW)-in hun rei tak an lo en thlak tawh Giggs chu rinkai a ni nghal.

Giggs chuan, "National team enkawl theihna hun ṭha ka nei hi ka lawm a, ka inchhuang hle a ni. Kan hmaah National League leh UEFA Euro 2020 qualifying round te a awm a, a phurawm hlein ka hria," tiin an ram team enkawl a châk tawh thu a sawi.

United winger hlui Giggs hi kum 1991 leh 2007 chhungin ram tan vawi 67 a inlan a, friendly match tam taka inhnuhdawh a chin avangin sawisel a hlawh a, club lama enkawltu Sir Alex Ferguson-a'n dem a hlawh bawk.

Giggs chuan insawifiahin, "Kei chuan tuna min sawiselna hi dik ka ti lo a, amaherawhchu football chu ngaihdan a ni a, kan pawm a ṭul a ni. Hei erawh an hriat a ṭul, match 1000 chuang ka khel a, uluk taka inekawl loh chuan hetiang zat hi ka khel thei lo ang," tiin match zawng zawng a khelh vek theih loh thu a sawi.

Wales hian March 22 hian Nanning-ah China a hmachhawn dawn a, he inkhel aṭang hian Giggs-a'n an ram team a enkawl ṭan ang.