Hnehna nen Sharapova a kir

17th January, 2018

Grand Slam vawi nga champion tawh Maria Sharapova chuan Australian Open second round lut turin Tatjana Maria chu straight-set in a hneh. Thawhṭanni zan khan Russian nula hian a ropui tawh ṭhinna hmun Margaret Court Arena-ah 6-1, 6-4 in hnehna a chang.

Kum 2016 Australian Open-ah khan Sharapova hi damdawi hman phal loh a hmang tih hmuh chhuah a ni a, kum hnih chhung tennis khelh thei lo tura an hrem hnuah thla 15 atan tih tawisak a ni. Sharapova hian hun harsa a tawh hnuah Melbourne Park-ah match hmasa ber a khel leh ta a, world number 47 lakah harsatna a tawk lo.

Kum 30 mi Sharapova chuan, "He hmuna rawn kir leh tur hian kum khat chuang ka nghah a ngai a, ka tan chuan tun hun hi a hluin nuam ka ti hle, engkim mai hian min ti lawm a ni," a ti. World number 48 Sharapova hian kum 2008 khan Australian Open nomawi hi a chawi tawh.

World number 1 hlui Sharapova hian Tatjana Maria lakah winners vawi 22 a vaw chhuak a, a ball vuak a la dikin a na hle. Mahse, unforced errors vawi 28 zet a nei a, set hnuhnung zawkah tihsual a ngah avangin set khatna angin set hnihna a la awlsam tawk lo. Sharapova chuan, "Grand Slam a nih tawh chuan eng match mah a awlsam lo," a ti.

Ningani hian second round-ah Sharapova hian Anastasija Sevastova a hmachhawn leh ang. Seeded 14-na Sevastova hian nikum September thla khan US Open last 16-ah Sharapova hi a lo hneh tawh a ni.

Hmeichhe singles inkhel dangah British number 1 Johanna Konta chuan American nula Madison Brengle chu 6-3, 6-1 in a hneh ve bawk. Seeded pakuana Konta hian Ninganiah world number 123 Bernarda Pera a hmachhawn leh ang.

World number 1 hlui Angelique Kerber pawhin harsatna nei loin Anna-Lena Friedsam chu 6-0, 6-4 in a hneh ve bawk. German nula hian kum 2016 khan Australian Open nomawi hi a chawi tawh a, season hmasa khan beisei phak lo mah se kuminah bul a ṭan fuh hle.

Seeded 21-na Kerber chuan, "Nikum kha chu ka mangṭha tawh. Ka hawi kir tawh lo ang a, hmalam ka pan zel zawk ang," tiin a sawi. Kerber hian tun season-ah match 10 khel tawhin hnehna a la chang vek.