Manchester United an chak zawn

Manchester United-in Premier League match thum a zawna an khingpui an draw hnuah a zawnin chak hmel an hmu leh ta. Thawhṭanni zan khan Jose Mourinho hote hian Old Trafford-ah Antonio Valencia, Anthony Martial leh Romelu Lukaku te goal hmangin Stoke City 3-0 in an hneh.

An insiamṭha
United hian League Cup quarterfinal-ah Bristol City 2-1 in an hneh lo a, hemi zawh hian league-ah Leicester City, Burnley leh Southampton te lakah point khat ṭheuh an hlawh chhuak a, match thum lekah point ruk an hloh tihna a ni.

Red Devils hian Goodison Park-ah Everton 2-0 in an hneh a, FA Cup-ah Derby County chu 2-0 bawka hneh zui lehin match zawna an chak bakah goal an chhuah lo.

Mourinho-a'n result ṭha neih duhin Stoke nena an inkhelh ṭum hian tlarhnung a rem phui a, first half-ah mikhual lamin nawr ve bawk mah se goal an chhuah lo. Paul Pogba-a'n United midfield a mawi a, first half-a Valencia leh Martial te goal ropui chu French midfielder siam sak ve ve a ni.

Minute kuana lekah Valencia hian Pogba hnen aṭanga a ball hmuh chu goal kilah mar ṭha takin a pet lut a, Mourinho chuan, "Valencia hian engpawh a tithei a ni. Goal a khung tawh hi chuan a ropui ṭhin. Inhliam hnuah a rawn let a, goal a khung bakah a khelh ṭhat avangin ka lawmpui," tiin a player a fak.

Minute 38-naah Pogba pass bawk chu Martial-a'n box pawn aṭangin goal kilah tak a lo dah a, goal mawi a ni. United boss chuan, "Martial khan training-naah pawh khatiang chiah khan a pet goal a, a danglamna chu Pogba pass ni loin ka pass a ni thung. Goal khungtu leh pass-tu te khan fak an phu a ni," tiin French forward goal chu vanneih goal a nih loh thu a sawi.

United-in second half-ah goal khung belhna tur chance ṭha an nghah a, amaherawhchu goal khat chiah an khung belh. Minute 72-naah Lukaku-a'n tharum hmangin chak nemnghehna goal a khung a, Belgian striker hian league-ah goal 11 khung tawh mah se United striker hian Harry Kane (20), Mohamed Salah (18), Raheem Sterling (14) leh Sergio Aguero (13) te a tluk lo.

An la inhnaih lo
Liverpool-in hmahruaitu Manchester City an hneh avangin United-in an hmelma hi an hnaih sawt a, amaherawhchu an inthlauhna hi point 12 zet a la ni.

Manchester United boss Jose Mourinho chuan, "Stoke-in attacking game khel thei tur player an lakluh avangin Old Trafford-ah ngampa takin an rawn khel ngam a, first half-ah khan kan tan harsatna an rawn thlen a ni," tiin inkhel chungchang a sawi.

City nena an inkar sawi chhunzawmin, "Liverpool leh Manchester City inkhel kha ka en lo a, khami result avang khan engmah a danglam phah lo. Kan inthlauhna hi a la tam a, tuna an dinhmun angah hian ka lo ding tawh a, an kutah engkim a awm," tiin champion tura Pep Guardiola hote dinhmun ṭhat tawh thu a sawi.