Dembele a inhliam leh tawh!

Pound maktaduai 135.5 man Ousmane Dembele chu Barcelona-in a theihna an chhawr tak tak hmain a inhliam leh ta a, Barcelona a pan hnua thla thum chhung zet hliam vanga inkhel thei lo forward hi thla khat dang a chawlh leh a ngai dawn.

Kum 20 mi France inter­national hian Real Sociedad 4-2 a an hneh ṭumin a hliam hi a tuar a, September-a a inhliam avanga a lo kir leh hnua a match li khelhna chauhah vanduai thlak takin a inhliam leh ta a ni - Barca tana thu lawmawm awm­chhun chu Dembele hliam tawrh hi a hliam neihna ngaiah a ni lo.

Barca thukhawchang
Barcelona chuan thuchhuah siamin, "Uluk taka en leh zirchian a nih hnuah Dembele hian a malpui hnung lamah hliam a nei tih hmuhchhuah a ni a, mah se he hliam hi season ṭantira a inhliamna kha a ni lo thung. A hliam avang hian kar thum aṭanga kar li thleng chu a chawlh a ngai dawn a ni," an ti.

Catalan club hian thlasik transfer-ah pound maktaduai 142-in Liverpool thiampuipa Philippe Coutinho chu an chhuhsak tawh bawk a, mah se Brazilian forward pawh hian Barca tana a match hmasa ber khel tur chuan thla thar a nghah thlen a ngai dawn a ni.

Barca inlan dawn
La Liga hmahruaitu Barcelona hian zaninah Copa del Rey quarterfinal an khel leh nghal dawn a, Espanyol khelmualah zan dar 1:30 hian an lenglut ang. Spanish Cup quarterfinal hi home & away-a khelh tur a nih avangin Barca tan khualmuala goal khung a pawimawh dawn a, Catalan derby hi a hmuhnawm ang.

Zanina club langsar inlan tur zingah Atletico Madrid an inlan dawn bawk a, Diego Simeone-a naute hian club ṭha Sevilla chu dar 11:30 hian an mikhual dawn. La Liga table lama pathumna dinhmun hauh mektu Valencia chuan zan dar 11:30 vek hian Alaves an mikhual ang - zaninah inkhel hmuhnawm pathum en tur a awm dawn e.