Jamshedpur khelmualah Kerala Blasters
Indian Super League zaninah khelh a ni leh tawh dawn a, table hnuai lama awm pahnih Kerala Blasters leh Jamshedpur FC an inhmachhawn dawn - zan dar 8:00-a inkhel turah inkhel hmuhnawm beisei ngam a ni.
Kerala Blasters-in Manchester United assistant manager hlui René Meulensteen enkawlna hnuaiah beisei ang result an neih loh hnuin ISL season hmasa bera an player-manager David James an hruai kir a, English coach enkawlna hnuaiah harh tharna an chang mek.
Liverpool goalkeeper hlui hian Kerala a enkawl leh hnuah match thum a kaihruai leh tawh a, tlawm hmel an hmu miah lo - match khatah Pune City inhnehtawkpuiin Delhi Dynamos leh Mumbai City an hneh leh tawh a, inrintawkna nen Jamshedpur an lenchilh ang.
Kerala club tan Mizo tlangval Lalruatthara chu defender pawimawh a ni a, Meulensteen enkawlna hnuaia tlarhnung ban rinawm hian James-a enkawlna hnuaiah pawh a hmun a la hloh lo - zaninah pawh Jamshedpur hmachhawn tura besei a ni.
South Indian club tana Jamshedpur zuam sual a nih theihna tur pakhat erawh TATA Steel enkawl club-ah hian season hmasaa an coach Steve Coppell chu coach a ni. English maanger hian Kerala club a hrechiang a, he club-a a lo enkawl tawh player a chhawm nual bawk - Blasters tan fimkhur a ṭul ang.
Jamshedpur-ah Jerry Mawihmingthanga chu player langsar a ni phak a, Steve Coppell enkawlna hnuaiah Chanmari tlangval hi a hmuhnawm ṭhin hle - Kerala tlarhnunga Ruatthara leh Wes Brown te ho tan ven uluk a ṭul dawn.