Bul ṭan fuh Novak Djokovic

Vawi ruk a champion tawhna hmunah Novak Djokovic chuan bul a ṭan fuh hle. Serbian tlangval hian nimin khan darkar khat leh minute 51 chhungin Donald Young hnehin Australian Open first round a paltlang.

Kum 30 mi Djokovic hian world number 63 Young lakah hian 6-1, 6-2, 6-4 in hnehna a chang a, second round-ah chuan Gael Monfils leh Jaume Munar te inkhela chak zawk a hmachhawn leh ang.

Grand Slam vawi 12 cham­pion tawh Djokovic hian hliam vangin season hmasa chawhnu lamah match a khel thei lo a, a ranking a hniam avangin tun tournament-ah pawh hian seeded 14-na a ni phak chauh a ni.

Margaret Court Arena-a hnehna a chan hnuah Djokovic chuan, "Thla hmasa kha chuan Australia-ah ka zin thei dawn nge dawn lo tih ka la chiang lo, ka kiu na vangin ka la buai reng a, harsatna nei loa ka inkhel thei ta hi ka lawm hle," tiin a sawi.

Djokovic chuan sawi zawm­in, "He hmuna ka inkhel leh thei ta hi ka lawm, thla ruk zet chawlh hnua inkhelh ve leh chu a lawmawm dan pawh a dang hle. Inelna ka hmachhawn loh rei avangin a tir lamah ka buai ang tih ka hlau hle, mahse inrintawkna ka neih avangin hartsatna ka tawk lo," tiin a sawi.

Mipa singles inkhel dangah player beisei awm Alexander Zverev chuan Italy tlangval Thomas Fabbiano chu 6-1, 7-6 (7-5), 7-5 in a hneh ve bawk.

World number 4 Zverev hian Rod Laver Arena-ah awlsam takin set hmasa ber la mah se set hnuhnung pahnihah erawh an inkhel tawh hle a, a tawpah tun hnaia khel ṭha tluang zawk chu a vanneiah a ṭang. German rawlthar duhawm hian a hnampui Peter Gojowczyk a hmachhawn leh ang.

Zverev chuan, "Season hma­­­sa khan ATP nomawi ka chawi nual a, mahse chung zingah chuan Grand Slam title a tel lo, kumina inelna lian kan hmachhawn hmasak berah hian hlawhtlin nghal tumin ka bei a, ka theihtawpin a sang thei ang ber thlen ka tum ang," tiin a sawi.

Kum 20 mi Zverev hian Rafael Nadal, Roger Federer leh Djokovic te chu player hlauh­awm la ni vek mah se rawltharte tan kawng a inhawng ve tawha a hriat thu a sawi bawk.