Stoke City manager thar Lambert
Premier League club Stoke City chuan Aston Villa leh Norwich City boss hlui Paul Lambert chu manager atan an lakluh thu an puang a, kum 48 mi manager hian kum hnih leh a chanve chhung atan contract a ziak.
Stoke City hian Premier League table-ah 18-na dinhmun an luah mek a, FA Cup aṭangin League Two club Coventry City chuan an pet chhuak bawk. Scottish manager hian Thawhṭanni zan khan Manchester United laka 3-0 a an tlawm lai inkhel a en a, nimin aṭang khan club training a zawm ṭan.
Lambert hian season hmasa zawh rual khan Championship club Wolves chu a chhuahsan a, Colchester, Wycombe Wanderers leh Blackburn Rovers te chu a lo enkawl tawh bawk.
Player a nih lai pawhin Lambert hian tawnhriat a nei ngah a, kum 1997 khan Borussia Dortmund tana a khelh laiin Champions League nomawi a chawi a, Scotland tan match 40 inlanin an ram team ṭha Celtic tan league nomawi vawi li a chawi hman.
Stoke tan Lambert hi an duhthlanna hmasa ber a ni lo. Republic of Ireland manager Martin O'Neill chu thawhpuiah sawm mah se tawnhriat nei ṭha manager hian a hnar a, Derby County manager Gary Rowett pawhin Championship club tana rinawm thlangin kum thum leh a chanve atan contract thar a ziah san a, Watford boss hlui Quique Sanchez Flores chuan La Liga club Espanyol-a cham chhunzawm a thlang bawk.