Hliam a dam ta - football-in run a lawi dawn e?

Kum 55 chu rei tak a ni - chuti zat kum liam taah khan England-in major tournament final an khel a, World Cup 1966-ah an champion.

England-in football khawvelah ro an rel zui dawn emaw an ti a, mahse, an ngaih ang ngawt a ni lo. 'Golden generation' hming an vuah meuhte pawhin eng ruai an ang lo a, chanchinbua an ṭhatzia an ziah chu inelna liana an champion teuh lai ber a ni.

Mahse, tunah chuan England-in final an lut leh ta a, ni e, kum 55 zet an nghah hnuah major tournament final an lut leh ta! 'It's coming home' tia football inti neitu taka an zaite pawh tunah chuan nuih liam a rem ta lo a, kum 55 hliam chu tuam dama awm ṭanin football-in run a lawi hnai e!

Nilaini zan khan England hian Euro 2020 final lut turin Denmark chu 2-1 in an hneh a, Simon Kjaer (own goal) leh Harry Kane (penalty) te goal hmangin an chak - Pathianni zan dar 12:30-ah Italy nen Euro nomawi an inchuh ang.

Ka aiawh England hmaah a ding!
Denmark thiampuipa chu Christian Eriksen a ni a, khelmuala a tluk meuh kha chuan Denmark lakah beisei tih san a har tawh takzet - mahse, khawvelin a la hriat lar tawk loh player pakhat a awm a, a hming chu Mikkel Damsgaard a ni.

Nikhaw hre loa Eriksen a tluk khan, "Euro a khelh chunzawm thei ang em?" tih ai chuan, "A dam chhuak ang em?" tih chu zawhna langsar zawk a ni a, Eriksen tel lohna Denmark tan fiahna hautak an hmaah a inchhawp.

Mahse, Damsgaard a lo pen chhuak a, kum 21 mi forward hian Eriksen-a thlen chin thleng turin kawng thui tak zawh tur la nei mah se theihna a neihsanzia erawh hmuh hmaih theih a ni lo.

England lakah pawh minute 30-naah freekick hmangin mawi zetin a pet goal a, goal ropui bik a ni. England-in tun inelnaa goal an chhuah hmasak ber a ni a, Euro 2020-a free kick hmanga goal khung hmasak ber a ni bawk - Damsgaard hian goal hnih khunga assist vawi khat neiin Euro 2020 a khar.

Wembley, harh ru!
England-in an khelmualah inelna an hmachhawn theih avangin an vannei a, Denmark ram mipuiten UK sorkar inkhuahkhirhna dan avangin London khawpui an pan thei lo lehzel bawk.

Mahse, mipui 60,000 chuang zinga a tam zawkin England an ṭan chungin Denmark player thawm a bengchheng zawk a, hma an hruai - World Cup 2018 ang thoin Three Lions hi semifinal-ah an hâhum ri a ring thei dawn lo em ni? tih zawhna a piang hman.

Mahse, England-in ngaihdan dang an nei a, tlawm an tum lo - huaisen takin Denmark an nawr zui a, Danish team-in hma hruai ringawt mah se inkhel thununtu chu England an ni.

Goal an chhuah aṭanga minute kuana lekah England an vannei ta nge nge a, Bukayo Saka cross aṭanga ball kal chu captain Simon Kjaer-a'n dan a tumna lamah an lamah a tlawh lut - AC Milan centre back hian lo pet fuh lo pawh ni se a hnungah Sterling a la awm tho a, Three Lions-in si phurh sut an phu.

A hming Kane
Chawlhlawk hman a nih hnuah England-in game an thunun zawk a, Raheem Sterling chu Denmark tlarhnung tan lu ti haitu a tling a, captain Kane a thawkrim a, a hlauhawm bawk.

Chutihrual chuan Denmark-in si ban nghak turin Kasper Schmeichel an nei a, Leicester City keeper hi a pa Peter Schmeichel ropuina avangin fak hlawh tawk lo mah se keeper thiam bik a nihzia chu hmuh turin a awm - Sterling, Kane leh Maguire te goal khung tur a dante chu pui tak a ni.

Denmark-in an tlarhnung leh Schmeichel zarah minute 90 chhung England an chelh thei a, penalty hmanga chak zawk an zawn mai rinna a lian hman hle - mahse, minute 104-naah England an vannei a, penalty an hlawh chhuak.

Sterling-a penalty hlawhchhuahna hi 'dive' niin lang mah se referee-in VAR meuh a rawn chungin a thutlukna a sawh sawn duh lo a, spot a kawk tlat - a pet turin Kane a lo pet chhuak a, Schmeichel-a'n dang zet mah se a per lehlam chu Kane hian goal-ah a chantir ta tho.

An inthlau
England-in an goal hnihna an khung hi minute 104-na a ni a, player nei ṭha lo zawk Denmark hian he goal a luh hma hian penalty hmanga chak zawk zawn chu an mitthla tawh niin a lang a, nawr let turin tha an nei tawh lo.

Three Lions-in Jordan Henderson, Jack Grealish, Phil Foden leh Kieran Trippier te bench aṭangin an luhtir thei a, Danish player ni ta se, Denmark tana bul ṭan phak tur vek an niin a lang.

Denmark erawh coach Kapser Hjulmand-a'n substitution a siam fuh tawk lo niin a lang a, chutihrual chuan loh theih loha Andreas Christensen leh Thomas Delaney-te lakchhuah an nihin a thlaktu player-te nen an inthlau hret.

A tawpah chuan chak phu zawk England an chak a, chutihrual chuan goal an khung hnua an huaisen tawk lohna te, Southgate-a'n Grealish la chhuak a, Trippier a luhtir leh dante kha 'football neitu' intitu khelh dan atan chuan a hmuhnawm lo a, England ṭantuten hei aia Three Lions huaisen zawk, an hming lem pu zo ngei hi final-ah hmuh an duh ang.

Ṭha takin kan khel thei a, a awlsam dawn lo tih hi chu kan hre sa a ni. He ramin semifinal paltlang leh tura kan nghah reizia leh ka player ṭhenkhatten tawnhriat an la neih tam tawk loh ngaihtuah chuan kan hnathawh hi a ropui takzet a ni. A lawmawm ber lai chu min ṭantute leh he ram mipuite tana hlimna ropui tak kan thlen hi a ni a, ni li dang chu mawi taka zinkawng khar tumin zinkawng kan zawh leh dawn a ni. Final kan luh avangin kan lawmin kan hlim tur a ni a, mahse, tih tur pakhat kan la nei tih theihnghilh loh a ṭha.
- Gareth Southgate, England coach

Kan khel ṭha takzet. Theihtawp tak meuh meuh kan chhuah a, goal kan chhuah hnuah chi ai loin, huaisen takin kan bei let a ni. Dawhthei takin kan nghak a, kan theihna leh huaisenna kan hriatchian avangin kan buai lo ang tih kha kan hria - a dik lam panin ke kan pen leh ta.
- Raheem Sterling, England forward

A awihawm loh zawk hial a, kan khel ṭha takzet - Denmark pawhin fak an phu a ni. Theihtawp kan chhuah a, a hunah tak kan rah a ni. Mahni khelmual ngeia final luh chu a dan a dang hle. 
- Harry Kane, England captain

Final kan hnaih takzet a, hrehawm ka ti hle. Mahse, ka naute hnathawh ka chhuang a, anmahniah hian thil tihtheihna danglam tak a awm a ni ber. Hmuhnawm takin football an khel a, a ṭul hunah kan nawr a, goal kan khung a, kan nihna tak kan pholang a ni. Ka player-te hian khelmual chhung leh pawnah an theihna zawng zawng an hlan tih ka hria.
- Kasper Hjulmand, Denmark coach

Hun han liam deuh se, thil tam tak kan zir chhuak tih kan hmu ang. Thawklehkhata engkim pawm vek mai hi chu a harsa rih a, mahse, zinkawng duhawm tak erawh a ni. A nihna takah chuan ka beisei aia thui zinkawng kan zawh a, chutihrual chuan final kan luh loh avangin hrehawm ka ti hle a ni.
- Simon Kjaer, Denmark captain

Hrehawm ka ti a, thinlung ruak vekin tunah hian ka awm mek a ni. Tournament chhung zawngin kan theihna zawng zawng kan hlan a, engmah hlawh chhuak loa semifinal kan thlah hian min tihrehawm a ni.
- Mikkel Damsgaard, Denmark midfielder