Mangṭha Denmark, in tawng leh ngei ang aw!

"Tunah chuan hrehawm kan ti a, mahse, engtikah emaw chuan he hun hi kan thlirkir ang a, 'Kan theihtawp kan chhuah a, kan ti leh thei em em ang,' kan la ti ang," tih chu England laka an tlawm hnu lawka Denmark coach Kasper Hjulmand thusawi a ni a, Euro 2020 hi a tawpna nih tir an tum lo.

Euro 2020-a team hmuhnawm ber pawl thlang dawn ila, he Denmark team hi tlarhma lama inrem tur zinga mi an ni - a tawpah erawh Wembley-ah England an ngam lo a, thinlung inchhuang tak chungin Denmark an pan thei ang.

Fak tlak Hjulmand
Hjulmand-a'n Denmark a enkawl dawnah, "Pressure i zo dawn lo a nih chuan national team i enkawl lo mai tur a ni," tiin huaisen takin a sawi a, match 34 zet a zawna tlawm tawh lo Denmark coach hna a chelh.

Euro 2020 zawha Denmark enkawl ṭan tura ngaih khan Covid-19 vanga Euro sawn a nih hnuin Euro-ah Danish team a kaihruai ta a, team hmuhnawm ber pawl min rawn chhawpsak.

Kum 49 mi coach hian Denmark a enkawl dawn hian football khawvela inhnamhnawihte chauh a kawm lo a, musician, chief executive, Denmark lal chhungkua leh prime minister hlui Helle Thorning-Schmidt te thlengin a kawm a, Danish 'nationalism' tak tak zirchian a duh vang niin an sawi.

Mittui karah beiseina
Hjulmand-a'n Euro-ah Denmark a kaihruai ta ngei a, a match hmasa berah a beisei loh thil a thleng nghal - an thiampuipa Christian Eriksen chu nikhaw hre loin a tlu a, hetihlaia Danish team inthurualna leh inpekna chu hahipa fak a ni.

Simon Kjaer-a'n captain nih a tlinzia a pholang a, player-ten Eriksen tana ṭhian nih an tlinzia an lantir bawk. Finland nena an inkhelah hian Eriksen chunga thil thleng avangin inkhel tihtawp lailawk a ni a, Danish midfielder a ṭha tih an hriat hnuah duhthlan tur pek an ni.

Denmark-in huaisen takin inkhelh chhunzawm an thlang a, 1-0 in an tlawm. Point thum hmuh ngeina tura ngaihah point an hlawh chhuak lo a, inkhelh zawhah Hjulmand-a'n mittui nen media a hmachhawn a, player-te nen 'enkawl' an mamawh thu a sawi!

Tuarna pawh hlawkna
Mahse, he Danish team hi an paukhauh tlat - an player ṭha ber an chan a ni satliah lo a, inkhelh laia thil thleng hian an rilruah nghawng lian tak a nei. Mahse, ram tana feh chhuak an ni a, hlauhthawnna an dah ṭha a, beiseinain an inthuam.

Denmark defender pawimawh Joakim Mæhle chuan, "Hjulmand hi kan tan a pawimawh takzet. Player-te min kawm nel peih a, kan rilru zawng zawng a bulah chuan kan sawi ngam. Christian chunga thil thlengah khan a rilru hrehawmna chu zep a tum hran lo a, ani pawhin puih a mamawh ve a ni tih a tilang mai a ni. Kan chunga thil thleng avang khan kan inhnaih lehzual a, coach ṭha tak a ni a, kan ṭhian a ni ta bawk," tiin coach a fak.

Hjulmand-a'n player enkawl a thiam miau a, a dawn let chu inrintawkna leh beiseina a ni - team ṭha zawk Belgium lakah tlawm zui mah se Russia chu 4-1 zetin an sawp a, group stage an lut chiang hle.

Mangṭha Denmark
Denmark-in last 16 an luh hnu thlengin player inhliam vangin harsatna an tawk a, mahse, an talbuai ngai lo - an aiawhte ṭha takin an rawn khel a, an tlang mai zel!

Match hmasa pahniha chak zo lo khan last 16-ah 4-0 in Wales an sawp a, quarterfinal-ah Czech Republic chu 2-1 in an hneh bawk - group stage aṭanga tla thei dinhmuna ding khan semifinal an lut a, a tawpah erawh penalty sawisel theih tak nen Euro an mangṭha ta thung.

Mahse, Euro 2020-a he team inkhel en a, Eriksen chunga thil thleng vanga ṭantute chuan Denmark mangṭha hi harsa an la ti fan a, "Intawng leh ngei ang aw," tiin World Cup 2022 thlir chungin Denmark an thlah.