Wimbledon aṭangin Federer a tla

Roger Federer-a'n a vawi kua nana Wimbledon title lak a tumna chu boruakah a thamral. Swiss star a chak loh rual chiah hian, grass court inelna lian berah a hmel kan hmu leh thei ang em, tih chu zawhna awm a ni zui nghal.

Mipa singles champion lai Novak Djokovic erawhin Marton Fucsovics hnehin semifinal a lut thung a, major title lak hnem lama Federer leh Rafael Nadal umphak a tumna chu a hlen chhuak teuh ta hle - match hnih chak a la hmabak.

Mangṭha Roger
Roger Federer inkhel en turin Centre Court khat tlatin mipui an pungkhawm thei tawh. British mipuite ngaihzawn rawn a inkhelh miau avangin phur takin an kal khawm; mahse an duh leh beisei ang erawh an hmu ta lo.

Grand Slam vawi 20 champion ni tawh hi rinkai ni mah se a tir aṭangin a che fuh hlei thei lo, darkar khat leh minute 48 an inkhelh hnuah 6-3, 7-6(4), 6-0 in a chak lo der. A service vawi nga a hloh laiin, a khingpui service ṭum khat chiah a chhuhsak thei.

All England Club-ah hian tun hmain Federer-a'n set la loa tlawm a la nei ngai lo. A hneh loh Hurkacz hi seeded 14-na a ni a, a match hmasa zawkah seeded pahnihna Daniil Medvedev a lo hneh tawh bawk, midang tan hmachhawn huphurhawm a ni tawh dawn.

Kum 24 mi Hurkacz hian semifinal-ah chuan Matteo Berrettini a hmachhawn leh dawn. Inkhel dangah Italian tlangval hian Felix Auger-Aliassime chu 6-3, 5-7, 7-5, 6-3 in a lo hneh ve thung a, a vawi khat nan Wimbledon semifinal a lut.

A chiang ta lo
Quarterfinal an khelh lai khan Federer hi kum 39 leh ni 337 mi a ni tawh, nakkuma Wimbledon an khelh leh meuh chuan kum 40 a chuang tawh dawn. A ropuina ramah hian a hun hnuhnung ber a hmang tawh a nih pawhin a mak lo ang.

A kum a tam tawh bakah hliam vangin a buai fo, tun hnai thla 17 chhungin tournament panga chiah a khel - a khup hliam vawi hnih ngawt zai a nih tawh bawk avangin atan thawh chhuah leh chu thil harsa a ni tawh dawn.

Grand Slam vawi 20 champion tawh Federer chuan, "Hliam vanga ka inenkawl lai khan thil tum fel tak ka nei, a hmasa berah chuan Wimbledon khelh hi a ni a, tunah chuan ka thil tum hmasa chu a lo tawp leh ta.

"Tunah chuan ngun takin ka inngaihtuah ang a, eng tianga awm zel tur nge tih ka hre chauh ang. Rilru, taksa, a bik takin ka khup dinhmun ka ngaihchan a ngai dawn. Ka tana Wimbledon hnuhnung ber a ni em, tih erawh ka la sawi thei lo," a ti.

Novak a tlang
Novak Djokovic chu Marton Fucsovics tan a la ṭha mah mah, seeded pakhatna hian darkar hnih leh minute 17 chhungin 6-3, 6-4, 6-4 in hnehna a chang a, major tournament bikah a vawi 41 nan semifinal a lut.

Grass court bika match 100 chak tling ta Djokovic chuan, "A bul kan ṭan fuh em em a, a hnu lam a awlsam phah hle. Set hnihna leh a hnuhnung ber atan chuan service vawi khat chhuhsak kha a tawk tawh," tiin a sawi.

Kum 34 mi Djokovic hian Grand Slam title 19 a la tawh, major title lak hnem lamah Federer leh Nadal (20 titles) chiah tluk loh a nei; season kal laiah Wimbledon leh US Open a la a nih chuan record ṭha ber nih theihna remchang a awm dawn.

Serbian star hian semifinal-ah Denis Shapovalov a hmachhawn leh dawn, seeded 10-na Shapovalov hian quarterfinal inkhel dangah Karen Khachanov chu 6-4, 3-6, 5-7, 6-1, 6-4 in a lo hneh ve bawk a, inelna neih laia khel ṭha tluang ber zinga mi a ni.