PSG-ah Ramos a lut fel
Paris St-Germain chuan Sergio Ramos an lalut fel a, Real Madrid defender hlui hian Paris club tan season hnih chhung daih contract a ziak - a hlawh zat tur erawh chiang taka tarlan a ni lo thung.
Kum 35 mi Ramos hian season 16 a cham chilh tawh Real Madrid tan a contract a hmang zo a, contract thar chungchangah Spanish club nen an inrem theih loh avangin a duh lam club pan turin a chhuak zalen.
A kum tam deuh tawh mah se sawmtu a la haihchham chuang lo. PSG an rawn lang a, Ligue 1 club lian hian a duh ang contract an pe phal. Inter Milan defender Achraf Hakimi leh Liverpool midfielder hlui Georginio Wijnaldum te hnung zuiin Paris a pan.
Mangṭha Real
Ramos hian a vanglai hun a hmanna Real Madrid tan khan match 671 a khelh aṭangin goal 101 a khung. Kum 2015 aṭanga club a chhuahsan thlengin captain dinhmun a luah a, khelmual pawn leh a chhungah hruaitu ropui a ni.
Spanish club ropui tan hian Champions League nomawi pali, La Liga title panga a la hman - La Roja player awm tawh zinga hlawhtling berte zinga mi a ni a, a hun hnuhnungah erawh a phu tawk ang zahna a hmu lo niin a lang.
Season hmasa kha hliam vangin a buai a, club tan a inlan tam tawk loh avangin Spain tan pawh koh a ni. Ram tana match 180 kheltu hi Luis Enrique-a'n Euro squad-ah a telh lo, ram tana inkhelh erawh a la chawlhsan rih lo.
Hello PSG
Ramos-a'n a club tharah hian Real Madrid lama a khelh pui tawh Angel di Maria leh Keylor Navas te a zawm dawn, a mikhual lo ang. Hun rei lote chhungin team hruaitu pawimawh a nih chhunzawm leh mai a rinawm.
Ramos chuan, "Paris St-Germain ka zawm hi ka lawm, ka nuna thil danglam lian tak a nih bakah chona a ni bawk," a ti. PSG chairman and chief executive Nasser Al-Khelaifi chuan tunlai khawvela defender ṭha ber zinga mi a nih thu a sawi ve bawk.
Mauricio Pochettino enkawl PSG hian season hmasa khan Lille lakah Ligue 1 nomawi an chan. League bakah Champions League thlenga hlawhtlin an tum a, club nei loa zalen lai Italy international goalkeeper Gianluigi Donnarumma an ngaihven mek bawk a ni.