England chak danin sawi zui a hlawh! Ball pahnih, penalty leh laser point

Nilaini zan khan Wembley Stadium-ah England-in Denmark 2-1 in an hneh a, a vawi khat nan European Championship-ah final an lut. Gareth Southgate-a hote team ṭha zawk an ni a, final luh an phu rualin an penalty hlawhchhuah dan leh a chhehvelah sawi zui hlawh a awm.

Denmark-in minute 30-naah Mikkel Damsgaard freekick hmangin hma an hruai a, minute kua hnuah captain Simon Kjaer-a'n an lamah a ti lut a, minute 90 chhungin 1-1 a ni. Extra time-ah Raheem Sterling-a'n penalty a hlawh chhuak a, Harry Kane-a penalty pet chu Kasper Schmeichel-a'n dang mah se England striker hian a per chu awlsam takin a khung.

Ball pahnih!
Minute 103-naah Sterling-a'n mual dinglam sirah ball a khalh phei a, khelmual chhungah hian Manchester City forward ball khalh lai bakah ball dang a lut. Sterling-a ball khalhna bul lawkah ball dang hi a awm a, assistant referee hnaih a ni bawk.

FIFA Laws of the game-a Law 5-ah chuan ball pahnih chungchang hi chiang takin a inziak. "Khelmual chhungah ball dang, thil sa khat emaw thil nung a rawn lut a nih chuan referee-in thutlukna chi hnihin a siam thei ang. Pakhatnaah chuan thil lut hian inkhel a tibuai a nih chuan inkhel a titawp ang a, drop ball hmangin inkhel a ṭan leh ang. Pahnihnaah chuan inkhel a tibuai lo a nih chuan inkhelh a kaltlang tir ang a, remchang hmasa berah thil lut hi an dah sawn nang," tih a ni.

Ball lut hian Sterling leh a chuhtu Denmark defender Joakim Maehle te a tihbuai hran loh avangin inkhelh kaltlang tir hi a awm lo hran lo. Chutihrualin ball pahnih hi an inhnaih em avangin Denmark ṭantu lam tan chuan sawisel theih tak a ni ang.

Penalty thutlukna
Sterling-a'n huaisen takin box chhungah ball a la lut a, Maehle bakah Mathias Jensen leh Jannik Vestergaard ten an hual. Manchester City forward tan Danish defender hi sut tlang rual a ni tawh lo a, mah se Maehle ke a sut thawi avangin a tlu.

Netherlands referee Danny Makkelie-a'n penalty a pe nghal a, VAR hmanga ennawn hnuah pawh penalty pek tho a ni. Inkhelh banah Sterling chuan, "Box chhungah ka khalh lut a, Maehle khan a ke a rawn rawlh a, ka ke a tawk fuh. Chiang takin penalty a ni," tiin a sawi.

Denmark keeper Kasper-a pa Peter Schmeichel chuan, "An tisual lian hle. Hun rei tak an sawi zui ang. Penalty a nih miau loh avangin thutlukna pawm harsa tak a ni," tiin a sawi.

VAR hian thil chiang bikah chuan referee thutlukna a thlak thei a, Maehle hian Sterling hi a khawih fuh ve det bawk avangin thutlukna hi an thlak lo a, sawi zui a hlawh reng bawk.

Laser chungchang
Kane-a'n penalty a pet hma khan keeper Kasper Schmeichel-a hmai zawn velah laser hringin an chhun. Danish keeper hi a tih buai phah em tih a hriat lo a, amaherawhchu penalty erawh a dang.

England fan-te hian hemi loah pawh hian Denmark player-te hi laser-in an chhun a, referee Makkelie report a zirin UEFA-in hremna a siam ang. UEFA hian tun hmain laser vangin hremna a lekkawh tawh.

Kum 2008 khan Manchester United leh Lyon te Champions League-a an inkhelh ṭumin Cristiano Ronaldo chu laser-in an tin fo a, French club hi £2,520 chawi tura tih an ni.

Kum 2011 khan England leh Wales te Millennium Stadium, Cardiff-a an inkhelh ṭumin entuten English player-te laser-in an chhun a, Three lions manager hlui Fabio Capello chuan thuneitute chu hremna lekkawh turin a ngen. Euro 2020-ah hian laser pointer hi ken phal loh zingah a tel a, nimin khan UEFA chuan hremna an lekkawh tur thu an puang.