Final khel lo tur Jesus

Brazil striker Gabriel Jesus chu Copa America 2021 final-ah a inlan thei dawn lo, quarterfinal-a red card a hmuh avangin South American Football Confederation chuan an hrem.

World champion vawi nga ni tawh Brazil hian quarterfinal-ah Chile 1-0 in an hneh, he inkhelah hian Jesus-a'n Eugenio Mena nen ball an inchuhna lamah a ke a khai sang lutuk a, a khingpui tana hlauhawm a nih avangin an hnawt chhuak.

Manchester City striker hian a tihpalh a nih thu a sawi a, a hnuah ngaihdam a dil zui bawk. Mahse, CONMEBOL chuan match hnih an hrem bakah $5,000 (Rs. 3,73,902)an chawitir a, hremna hi khin let theih a ni lo. A pawisa chawi zat hi India pawisa chuan nuai thum sing sarih vel daih a ni.

Copa America final hnuhnung berah khan Jesus hian goal a khung bakah assist neiin an ram a champion pui, tun ṭum final a khel thei lo tur hi Brazil tan channa lian a tling dawn, a hmun ruak luah tur erawh an nei ang.

Jesus an hnawh-chhuah tirh khan Neymar-a'n a ṭhianpa a ṭan thu leh a tihpalh a nih thu a lo sawi tawh a, tunah final khel lo tura an hrem tlang chungchangah CONMEBOL a dem thu a sawi chhuak zui leh ta.

Neymar chuan, "Match hnih hrem, khin let theih loh bawk. CONMEBOL hian thil thleng kha a en chiang lo deuh a nih ka ring," tiin South America khawmualpuia football thuneitu sang a sawisel.

Champion lai Brazil hian Pathianni zing dar 5:30 hian final khel turin Maracana Stadium, Rio de Janeiro-ah Lionel Messi awmna Argentina an hmachhawn ang.