Manuel Neuer a captain zel dawn

Bayern Munich manager thar Julian Nagelsmann chuan club enkawl a tum dan ṭhenkhat a sawi a, captain ni lai Manuel Neuer-a'n a dinhmun a ngai a luah chhun zawm tur thu a sawi chiang.

Tun thla tawp a kum 34 tling tur Nagelsmann hian Hansi Flick thlakin Byern a enkawl dawn, goalkeeper Neuer hi kum 35 mi a nih tawh avangin amah aia upa zawk captain atan a hmang dawn tihna a ni.

RB Leipzig manager hlui Nagels-mann chuan, "Thutlukna ka siam fel tawh," tiin a captain Neuer chungchang a sawi a, thlak tumna a nei lo. Neuer hian 2017 aṭang khan Philipp Lahm thlakin Bayern captain dinhmun hi a chelh.

Nagelsmann hian a zawna season kua ngawt Bundesliga champion ni thei a enkawl dawn a, team nghet ṭha tak enkawl tur ni mah se hna thawh tur erawh a ngah dawn. A pawimawh hmasa atan David Alaba leh Jerome Boateng te hmunruak hnawh khah a ni ang.

Bayern hian Dayot Upamecano chu Leipzig aṭangin an lalut fel tawh. France international hi a club hmasa lama a lo hriat tawhsa a nih avangin a hmang thiam ang tih chu a rin theih - amah ang bawka French player dang an awm avangin a mikhual lo tura ngaih a ni bawk.

Nagelsmann chuan, "Upa nen hian kan inhriatna a rei tawh, a khelh dan phung pawh ka bel hle. Benjamin Pavard, Lucas Hernandez leh Niklas Sule te nen ṭha takin an inkawp thei ang," tiin a sawi.

German champion hian season thar inbuatsaih nan Cologne, Ajax, Moenchengladbach leh Napoli te nen friendly match an khel dawn. Manager thar Nagelsmann-a'n inelna pangngai a hmachhawn hmasak ber tur chu August 8-a Bremer SV nen German Cup an khelh tur a ni ang.

Bundesliga lamah chuan season khuh hawn nan August 13 hian Monchengladbach an lenchilh dawn.