Flick puitu tur Rohl leh Sorg

Germany coach Hansi Flick-a‘n August 1 aṭangin hna a zawm dawn, assistant coach atan Danny Rohl leh Marcus Sorg te a hmang dawn.

Kum 32 mi Rohl hi Bayern Munich-ah Flick-a assistant a ni a, Germany-ah hian kum thum atan contract a ziak. Kum 55 mi Sorg hian March 18, 2016 aṭangin Germany assistant coach hna hi a chelh tawh a, hemi hma hian Germany Under 19 enkawl tawh bawkin kum 2024 thleng atan contact a ziak ve bawk.

Germany hian Euro 2024 an thleng dawn a, Rohl leh Sorg hian Euro thleng daih turin contract hi an ziak. National team leh academy director Oliver Bierhoff chuan, „Hlawhtlinna chang turin coaching staff te an inrintawk a ṭul a, Flick leh Rohl te thawkdun tur hi ṭha ka ti. Chutihrualin Flick-a team chhung hrechiang sa Sorg chunga rinna a nghat hi a lawmawm ka ti bawk,“ tiin a sawi.

Hetihlai hian goal-keeping coach Andreas Kopke erawhin kum 17 hnuah a hna a chhuahsan dawn. Euro 1996 semifinal-a Gareth Southgate-a penalty dangtu Kopke chuan, „Hansi Flick hnuaiah Germany-in ropuina an neih let hi ka ring a, duhsakna ka hlan. Jurgen Klinsmann leh Joachim Low te hnuaiah hun duhawm tak kan hmang ho a, an chungah ka lawm hle a ni,“ tiin a sawi.

Flick-a hnuaia Germany inlan hmasak ber tur chu September 2, zan dar 12:15 a ni dawn a, World Cup qualifier-ah Liechtenstein an hmachhawn ang.