Bundesliga entu an awm thei dawn

German rama football inelna sang ber chu season thar an ṭan hunah entu an awm thei dawn. Stadium khatin pungkhawm nghal lo mah se a hmunah mi 25,000 chin an lut thei tawh dawn.

Hri leng vangin infiamna khawvel a buai a, a hmuna entu an awm thei lo rei hle. Tun kar tir lam khan Berlin khawpuiah state hrang hrang 16 aṭangin thuneitu an inhmukhawm a, inkhel entu awm theih tur thu hi an puang.

Inkhel entu awm thei mah se a hmuna en tur erawh chuan invenna (vaccine) lak emaw, hri an kai lo ngei a ni tih fiahna an ken a ngai dawn, Tun hma angin a duh duh tan en ngawt theih erawh a la ni dawn lo tihna a ni.

Bundesliga season thar hi August 13 aṭangin an ṭan dawn, a tirah entu 25,000 awm thei a nih dawn bakah hian, hun rei lote hnuah chuan stadium leng zat aṭanga chhutin 50% an awm thuai theih a beiseiawm.