Damsgaard hralh kan phal lo - Sampdoria President

Sampdoria president Massimo Ferrero chuan England lama freekick mawi taka pet goaltu Mikkel Damsgaard chu hralh an phal loh thu a sawi.

Italian club Sampdoria hian kum 2020 khan Damsgaard hi euro matkaduai 6.7-in Norwegian club Nordsjaelland aṭangin an lalut a, Danish winger hian season hmasa berah league match 35 khelin goal hnih a khung.

Khawvelin an ngaihven ṭanna erawh Euro 2020 a ni a, group match hnuhnung bera Russia 4-1 a an hneh ṭumin goal hmahruai mawi zetin a khung a, England lakah khung lehin Euro 2020-a freekick pet goal awmchhun a la ni.

Sampdoria president Massimo Ferrero chuan, "European Championship-ah hian a khelh ṭhat ka ring sa, rin ang ngeiin khelh ṭha mah se hralh kan phal lo. Chutihrualin sporting director Carlo Osti lawmna khawp thil a thleng a nih chuan kan ngaihtuah thei ang a, chuti a nih ngawt loh chuan kan hralh lo ang," tiin a sawi a, sum tam tham chuan hralh a phal niin a lang.

Damsgaard hi Russia lama goal a khung khan kum 20 leh ni 353 mi a ni a, European Championship-a Danish player goal khung naupang ber a ni. Euro match nga a khelh aṭangin goal hnih a khung bakah assist vawi khat a nei a, a chevel a hmuhnawm bawk. Europe club lianin Danish forward hi an duh a nih chuan euro maktaduai 40 chho an lei ngam a ṭul ang.