Nomawi humhim kan tum - Inzaghi

Inter Milan manager thar Simone Inzaghi chuan Serie A title an kawl lai humhim ngei an tum thu a sawi a, league bakah European football lamah pawh hmasawn ngei an tum thu a sawi bawk.

Lazio manager hlui hian Antonio Conte thlakin Inter enkawl hna a thawk dawn. Conte khan kum 11 hnua a vawi khat nan Inter hi league title a lakpui a, hmasawn zel duh mah se club thuneitu lam nen an thu a inhmuh loh avangin a chhuak.

Conte chhuah chhan kha player leina tur an neih loh vang a ni a, heng bakah hian an neih ṭhatsa an hralh dawn bawk vang a ni. Conte a chhuak a, an player pawimawh Achraf Hakimi chu Paris Saint Germain lamah an chan fel leh tawh bawk a ni.

Inzaghi chuan, "Hakimi chhuah tur thu kha chu ka hre lawk, player pawimawh dang erawh an chhuak lo ang. Ka naute ka inkhelh tur ṭhin danah wing back an pawimawh a, ani hmun ruak luah tur pawh kan neih ngei a ngai dawn.

"Hakimi leh Ashley Young an awm tawh lo, anni pahnih khelhna hmuna khel thei player dang kan la nei tho a, a ṭul a nih chuan squad ti chak thei tur midang pawh kan neih belh ka beisei," a ti.

Serie A-ah hian season kua zet chu Juventus-in ro an rel. Old Lady rorelna hi Conte-a'n a titawp a, mahse a hna a thawk chhunzawm dawn lo. Juve hian champion leh nghal tumin manager thar Massimiliano Allegri an nei leh tawh thung.

Inzaghi chuan, "Lazio ka enkawl lai khan goal kan khung hnem a, inkhel hmuhnawm kan chhawp chhuah avangin fans an lawm ṭhin. Attacking football khelh zui kan tum dawn, goal khung hnem chunga nomawi humhim kan tum dawn a ni," tiin a sawi.