Marseille-ah Guendouzi a kal

Arsenal midfielder Matteo Guendouzi chuan season thar lo awm tur atan Marseille chu loan hmangin a zawm a, a loan hun a zawh hunah Ligue 1 club hian an duh a nih chuan a nghetin an la thei nghal bawk ang.

French midfielder hian 2018 khan Lorient aṭangin Gunners a zawm, manager Mikel Arteta awm hnuah hmun pawimawh a chang phak lo - season hmasa khan Bundesliga club Hertha Berlin lamah loan hmang bawkin a lo chhuak tawh.

Thu chhuah siamin Marseille chuan, "Guendouzi hian tharum a ngah, ball pass a thiam hle bawk. Hmathlir thui tak a neih ṭhin avangin club tan a la ṭangkai dawn. Olympic Marseille team chuan lawm takin kan lo lawm lut," an ti.

Arsenal hian beiseina sang tak nena an lakluh William Saliba pawh Marseille lamah hian loan hmang bawkin an kaltir a rinawm. Saliba hian Gunners an zawm hnuah Nice leh Saint Etienne-ah loan in a lo chhuak tawh.

North London club manager Arteta-a'n squad tih danglam a tum a, tun nipui chhungin defender David Luiz chu an chhuahtir tawh bawk. Luiz hmun ruak luah tur hian Brighton defender Ben White an hel mek.