En châkawm Copa America final

Copa America final chu July 11, Pathianni zing dar 5:00 hian Argentina leh Brazil ten Maracana Stadium-ah an khel dawn, football ram ropui pahnih inkhel tur a nih avangin final duhthusam tia sawi theih a ni ang.

Maracana Stadium
Inkhelh tur a ropui ang bawkin final khelhna hmun pawhin sulhnu a nei ṭha a, Maracana Stadium hian World Cup final thlengin a lo thleng tawh. Chung zinga langsar ber chu 1950 World Cup kha a ni.

Maracana Stadium hi June 16, 1950 khan hawn a ni a, Brazil-in World Cup an thleng. Final-ah Brazil leh Uruguay an inkhel a, entu pungkhawm zat chu 199,854 tehmeuh an ni. Mualneitu hi champion tura ngaih ni mah se Uruguay-in 2-1 in an hneh ta zawk.

Tun hnuah hi chuan mipui himnate an ngaihtuah avangin mi nuai khat lenna stadium hi a awm ta meuh lo a, Gujarat-a cricket khelhna stadium Narendra Modi Stadium-ah entu 132,000 an leng a, mipui nuai khat chu tam tak a ni. Maracana-ah hian entu 150,000 emaw a aia tam an punkhawm chu ṭum 26 zet a awm. Hetiang zat an punkhawm hnuhnun ber chu May 29, 1983 kha niin Flamengo-in Santos 3-0 in an hneh.

Maracana hi ṭum thum chei ṭhat a ni tawh a, kum 2000, 2006 leh 2013 te khan an chei ṭha. 2007 Pan American Games khan opening leh closing neih nan an hmang a, 2013 FIFA Confederations Cup leh 2014 World Cup bakah 2016 Summer Olympics leh Paralympics te a thleng.

Ram ṭha pahnih
Khawvel football ram ropuia bera sawi chu Brazil an ni a, FIFA World Cup-ah vawi nga champion tawhin nomawi chawi ngun ber an ni. Amaherawhchu Copa America-ah erawh record nei ṭha ber chu football thiam hmasa ram Uruguay an ni a, vawi 15 an champion. Tun ṭum final-a inhmachhawn tur Argentina leh Brazil hi vawi 14 leh vawi kua champion tawhin pahnihna leh pathumnaah an awm.

Chutihrualin Brazil hi champion lai an ni tih hriat a ṭha a, tunah inelna thlengtu an ni bawk. Sawi hmaih theih miah loh chu Brazil-in Pele an nei ṭhin a, Argentina-in Diego Maradona an kawl ṭhin. Tunah hian Selecao-in Neymar an kawl a, La Albiceleste-in Lionel Messi an kawl thung.

Neymar leh Messi te inkhel ringawt pawh hi inkhel enna tham a ni a, mak ang reng tak erawh Messi hian Copa America nomawi a la chawi lo. Argentina hi 1993 Copa America-ah khan Gabriel Batistuta hoin an champion a, hemi hnu hian inelna lian thamah an la champion leh lo.

Tun ṭumah hian Argentina leh Brazil hi group hmahruaitu an ni ve ve a, chak loh an nei lo. Selecao hian group stage-a goal hnih an chhuah bak an chhuah belh lo a, La Albiceleste hian group stage-ah goal hnih tho an chhuah.

Amaherawhchu quarterfinal-a Colombia nen an inkhelh ṭumin goal an chhuah a, penalty hmanga chak zawk zawn ṭul phahin keeper Emiliano Martinez-a'n a chhanhim a ni.