Euro 2020 golden boot dawng tur - Ronaldo nge Kane?

European Championship-ah final chauh khelh tur a awm tawh a, Wembley Stadium-ah England leh Italy an inkhel dawn. Football thiam ram pahnih an inkhelh dawn avangin final a hmuhnawm dawn a, nomawi inchuhna inkhel en a châkawm ang bawkin golden boot dawng tur pawh hriat a châkawm hle.

Portugal captain Cristiano Ronaldo-a'n goal nga a khung a, golden boot dawng turin a dinhmun a la ṭha ber. Juventus forward Ronaldo elpui thei tura ngaih chu England forward Harry Kane leh Raheem Sterling te an ni ang.

A tehfung
Tun ṭum inelnaah hian Cris-tiano Ronaldo bakah Patrick Shick ten goal nga an khung a, amaherawhchu golden boot dawng tur hian tehfung a hranpaa duan a nih avangin Portugal captain dinhmun hi a ṭha zawk.

European Championship-ah hian golden boot dawng tura tehfung chu goal khung tam, assist nei tam, minute khel tlem leh qualifying round-a goal khung tam a ni. Hemi a nih avang hian goal nga khung ve veah assist nei lo Shick aiin assist vawi khat nei Ronaldo a chung zawkah a awm.

Assist an neih zat hi intluk ta chiah pawh ni se Ronaldo inlan hun chhung hi a rei lo zawk a, Czech forward hian a tluk pha lo. Goal khung thei player France striker Karim Benzema, Sweden forward Emil Forsberg leh Belgium striker Romelu Lukaku te an tlak vek tawh avangin Ronaldo hnuaiah an awm a ṭul tawh.

Hei le, Kane
Euro qualifier-a goal khung tam ber chu Harry Kane a ni a, England striker hian goal 12 a khung. Tottenham Hotspur striker hnuaiah Portugal forward Cristiano Ronaldo leh Israel forward Eran Zahavi te an awm a, goal 11 ve an khung.

Euro 2020 inelna takah erawh Kane hian group stage-ah goal a khung lo a, Ronaldo erawh last 16-ah Belgium hneh loa an tla chungin goal nga a khung hman. Knockout stage-ah Kane a rawn inlar ṭan a, final an thlen meuh chuan goal li a khung tawh.

Amaherawhchu Kane hi Ronaldo aia a minute inlan zat a tam tawh avangin golden boot dawng tur chuan Italy lamah goal hnih khung a ṭul tawh dawn. English striker hian Ukraine lakah goal hnih a khung thei a, Azzuri lakah khung leh a tum ang.

Beisei nei Sterling
Raheem Sterling-a'n Denmark nen an inkhelh ṭumin goal khung theihna hun ṭha bik ṭum hnih a nei a, a khung lo ve ve. A hmasa zawkah Sterling hian keeper Kasper Schmeichel a pet per a, a hnuhnung zawkah Simon Kjaer-a'n rawn khawih hmanin Denmark captain-in an lamah a ti lut.

Manchester City forward Sterling hian tun inelnaah goal thum chauh a la khung nachungin assist vawi khat a nei a, final-ah goal hnih leh assist vawi khat a neih theih chuan Ronaldo chungah a awm thei dawn. Italy player zingah erawh Ciro Immobile, Lorenzo Insigne, Federico Chiesa leh Matteo Pessina ten goal hnih ṭheuh an khung a, golden boot dawng tura hattrick siam a ṭul tawh hlawm avangin a harsa tawh ang.