Saina leh Srikanth an tla nghal

Badminton inelna ngaihhlut All England Championship chu Nilani zan aṭang khan khelh ṭan a ni a, Indian player langsar Saina Nehwal leh Kidambi Srikanth te an chak lo nghal - PV Sindhu erawhin secound round a 

inhlangkai thung.

World number 1 hlui Saina tan Akane Yamaguchi a thiam hret, Japanese nula nen hian minute 28 an inkhelh hnuah Saina hi 11-21 8-21 in a chak lo, hneh nei loa a tlak avang hian world ranking lamah hma a sawn dawn rih lo.

Tun dinhmunah Saina hian Badminton World Federation ranking-ah point 46267 neiin 20-na a ni mek. London Olympic bronze medalist hian Tokyo Olympic khelh ngei a duh a, mahse a harsa tawh dawn - April 28 hmain a sang zual 16 zingah a invawrh chhoh a ngai.

Kum 29 mi Saina hi Swiss Open (March 17-22), India Open (March 24-29) leh Malaysia Open (March 31-April 5) ah te a inlan chhunzawm dawn. Tournament khelh hmabak la nei mah se tun hnaiah result a nei ṭha tawk lo a, hri leng vangin inelna ṭhenkhat hi ṭhulh thut theih a la ni bawk.

Tunlai India tlangval zinga badminton huanga thleng sang leh Olympic medal pawh beisei phak Kidambi Srikanth chuan season hmasa aṭang khan beisei a phak thei lo. Tun ṭum a match hmasa berah pawh Olympic champion lai Chen Long lakah 15-21, 16-21 in a chak lo.

World number 1 hlui Srikanth hian minute 43 an inkhelh chhungin chungnung taka awm lai a nei lo, world number 5 Chen Long-a'n harsa lo takin India tlangval lakah ro a rel. World number 12 ni lai Srikanth tan Olympic khel turin a ranking humhim theih a pawimawh ta hle.

Mipa singles inkhel dangah Lakshya Sen chuan Cheuk Yiu Lee 17-21, 21-8, 21-17 in a hneh thung. Sen-a hian Hong Kong tlangval lakah hnehna chang turin minute 59 ngawt a mamawh, a match lehpekah chuan world number 7 Viktor Axelsen a hmachhawn dawn a ni.

Badminton world champion ni lai Sindhu chuan a match hmasa berah Beiwen Zhang chu straight game in a hneh, Indian nula hian American player hi minute 40 chhungin 21-14, 21-17 in a ngam.  

Rio Olympic silver medalist Sindhu hian Zhang nen an intawn vawi 10-ah a ṭum ruk nan hnehna a chang, an intawn hnuhnung zawk Korea Open-ah a chak loh avangin tun ṭuma a chak leh hi atan chanchin ṭha a ni.

Seeded parukna Sindhu hian a match lehpekah chuan Sung Ji-hyun a hmachhawn leh dawn, South Koren nula Sung hi seeded chang phak lo a nih avangin Sindhu hi rinkai zawk a ni ang.

Inelna neih ṭan ni hi Indian player tan lawmna leh lungngaihna a inpawlh nasa hle. Sindhu a chak lai hian mixed doubles pair Pranaav Jerry Chopra leh N Sikki Reddy te erawh seeded pakhatna Si Wei Zheng leh Ya Qiong Huang te lakah 13-21, 21-11, 17-21 in an tlawm thung.

Yonex All England Open Badminton Championships 2020 hi a sawi awlsam nan All England Open tih a ni mai ṭhin, inelna hi Arena Birmingham, England-ah neih niin BWF season kal laia tournament pangana a ni.

Kumin hian lawmman atan cheng nuai 816 sem a ni dawn, mipa leh hmeichhe singles huangah chuan player pariat zelin seeded an chang. Indian player zingah PV Sindhu chu seeded chang phak niin parukna pek a ni. Britain rama badminton inelna ngaihhlutah hian Indian shuttler pahnih chiahin hlawhtlinna an la chang. Kum 1980 khan Prakash Padukone a champion a, kum 2001 khan tuna India chief coach ni ta Pullela Gopichand a champion ve leh bawk.