Ronaldinho-a'n a boot a khai

Football mawina belhchhahtu Ronaldinho chuan professional football a khelh tawh loh aṭanga kum hnih hnuah football khelh a chawlhsan a, he thu hi Ronaldinho agent leh unaupa Roberto Assis chuan Thawhlehni khan a tichiang.

Assis chuan, "A chawl tawh, a tawp ta," tiin Brazilian star chuan inkhelh a chawlhsan thu a sawi a, FIFA World Cup-a champion thlahna inkhel hi chi hrang hranga neih chhoh a nih tur thu a sawi. Ronaldinho unaupa Assis chuan, "A thlahna hi Brazil, Europe leh Asia ah te kan buatsaih chho ang a, Brazil team nen pawh engemaw tak buatsaih kan tum ang," tiin a sawi.

Kum 37 mi Ronaldinho hian Brazil club Gremio aṭanga bul ṭanin an ram club tho Fluminense-ah a hun tawp a hmang. July 11, 2015 khan Ronaldinho hian thla 18 daih contract a ziak a, amaherawhchu thla hnih chhungin match kua lek a khel a, supporter lamin an sawisel nasat bawk avangin club nen inremsiamnain a contract an titawp a, hemi hnu hian professional club-ah a inziak lut tawh lo.

Hun hma lam
Ronaldo de Assis Moreira hming puin March 21, 1980 khan Porto Alegre, Brazil-ah a piang. A pa Joao Moreira chu professional footballer hlui niin lawng siamna hmunah welder hna a chelh. A nu Miguelina de Assis chu cosmetics lam zuar a ni a, a hnu lamah erawh nurse hna a chelh thung.

Ronaldinho unaupa Roberto Assis pawh hi professional footballer a ni a, a pian hlim aṭangin footballer-in an hual nghal. Hemi chungchang hi sawiin Ronaldinho chuan, "Ka pate a, ka pa leh ka unaupa te footballer vek an ni a, ka sei lenna hmunin a zir bawk a, thil tam tak ka zir a ni," tiin a sawi.

Kum riat leka upa a nihin a pa Joao chu lungphuchawlin a thi a, Ronaldinho chuan, "Ka pa a thih khan naupang te la nih mah ila, ani kha ka career-a mi pawimawh ber pakhat a ni. Thil pawimawh tak tak min hnutchhiah hman a, khelmual pawnah chuan 'Thil dik ti tur leh rinawm' turin min fuih a, khelmual chhungah chuan 'Awlsam thei ang bera khel' turin min chah a ni," tiin a sawi a, Brazilian star hian ball a khawih tawh chuan thil harsa pawh a lang awlsam ṭhin reng a ni.

A hming atan Ronaldinho
A naupan laia a tet ṭhin avangin a hming tak Ronaldo ni loin Ronaldinho tiin an ko a, Ronaldo 'te' tihna a ni.

Ronaldinho chuan, "Ka naupan laia keimah aia upa te ka khelhpui ṭhin avangin ka te bik ṭhin a, chuvangin Ronaldinho tihin min ko ṭhin. Senior national team-a ka tel khan Ronaldo a awm sa a, ka naupan zawk avangin Ronaldinho tiin min ko leh bawk," tiin a hming put dan a sawi.

Hun harsa leh Futsal
Ronaldinho hi chhungkaw rethei aṭanga seilian a ni a, a naupan lai chanchin a sawinaah pawh an inkhehna hmuna phaitual hnim awm chhun chu corner flag bulah chiah a awm thu a sawi a, lei char aṭanga inzir chho ve tho a ni.

A thiamna danglam tak erawh futsal aṭanga a neih chhoh a ni a, kum sarih mi a nih aṭangin awmze neiin a inkhel ṭan tawh. Ronaldinho chuan, "Ka chet dan hmang tam tak hi futsal aṭanga ka zirchhuah a ni a, khelmual zim tea khel kan nih avangin kan ball dawn dan pawh a dang a, tun thleng pawh hian ka ball lak thlak dan hi futsal player nen hian a inzul hle," tiin futsal aṭanga inzir chho a nih thu a sawi.

Thiam tura piang
Ronaldinho hi a rualpui zingah pawh a langsar a, kum 13 mi lek a nihin match khatah goal 23 tehmeuh a khung thei a, a danglam tih a chiang hle.

Kum 1997-ah FIFA Under-17 World Championship khel turin koh a ni a, Eygpt-a inelna neiah an ram team chu a champion pui a, Brazil club zinga sulhnu nei ṭha ber zinga mi Gremio-in contract puitling an ziahpui nghal bawk.

Khawvel hriat
Kum 2001 khan Ronaldinho hian euro maktaduai ngain Paris Saint-Germain a zawm a, khawvel hriat a hlawh ṭanna tak erawh 2002 FIFA World Cup a ni. Ronaldinho hi World Cup-ah Ronaldo leh Rivaldo te nen inkawpin 'Three R's' tih hminglem pek an ni.

Korea leh Japan-a neih inenaah hian Ronaldinho hi match ngaah inlanin goal nga a khung a, goal luh theihna turah a inrawlh nual bawk. An sawi zui tak erawh quarterfinal-a England nena an inkhel kha a ni a, Michael Owen goal vanga goal an chhuah hnuah Brazil-in goal an mamawh. Ronaldinho hian mual chanve aṭangin ball a la phei a, defender lar ṭhin Ashley Cole chu a ke chheh hmanga a bum hnuah Rivaldo goal khung tur a siam sak. Brazilian star hian freekick aṭangin yard 40 aṭangin chakna goal a khung zui a, England keeper David Seaman a rep chiang hle.

Brazil-in FIFA World Cup nomawi a chawina kawngah Ronaldinho hi a pawimawh a, PSG aṭangin Barcelona chu kum 2003-ah a zawm a, Catalan club nen an par dun zui a, khawvel player ropui ber zingah a invawrh chho. Amah hi Lionel Messi-a'n tun dinhmun a thlen theihna chhan a ni a, Argentina star pawh hian a dah sang hle.

Messi chuan, "Ronaldinho hi Barca-a danglamna thlentu a ni. Khatih hunlai khan Barca tan hun harsa a ni a, a rawn thlen chin aṭang chuan engkim a danglamn a ni," tiin a fak a, Argentina captain hian Ronaldinho aṭanga thil tam tak a zir thu a sawi bawk.

Chanchin tlangpui
Ronaldinho hian an ram Brazil chu inelna lian pathum Copa América (1999), FIFA World Cup (2002) leh FIFA Confederations Cup (2005) ah te a champion pui vek a.

Club-ah pawh career ṭha tak a nei a, Paris Saint-Germain chu 2001 khan UEFA Intertoto Cup-ah a champion pui a. A hming chherna ber Barcelona chu La Liga-ah vawi hnih (2004-05, 2005-06) a champion pui bakah Champions League-ah 2005-06 season khat a champion pui leh bawk.

Catalan club aṭang hian AC Milan a pan a, Italian club hi 2010-11 season khan Serie A-ah a champion pui leh a. Brazil-ah letin Flamengo-ah a kir a, an tlangzarh ṭum chuan mipui 20,000 zet an pungkhawm.

Flamengo-ah nomawi a chawipui lo a, hemi hnu hian Atlético Mineiro panin Copa Libertadores (2013) leh Recopa Sudamericana (2014) ah te a champion pui a. Club nena inremsiamin contract a titawp a, club khelhna a neih loh chiah hian sawmtu a ngah a, chung zingah chuan ISL club Chennaiyin FC pawh an tel.

Ronaldinho-a'n Mexican club Querétaro a thlang a, a hun hnuhnung lamah sulhnu chhinchiahtlak a nei tawh meuh lo. Liga MX club-ah hian season khat a awm hnuin an ram club Fluminense a zawm leh a, theihna sang tak la nei mah se khelmual pawn lama a nun thlahdah avangin a zuih ral ta a ni.

Mangṭha Ronaldinho
Feet nga leh inches 11-a sang Ronaldinho hi hmelṭha tia sawi tur ni lo mah se hlim hmel a put reng avangin duhawmna riau a nei a, ball chhaih kual a thiam em avangin Brazilian star hian ngaisangtu leh atchilhtu a ngah hle.

Football-ah khelh dan hmang a tam a, tunlai chhanah chuan chak tum vanga defensive game khel tawp pawh an awm. Ronaldinho erawhin football mawina a belhchhah a, goal a khung pawhin a satliah ngai lo a, a ball pass hote pawh en a nuam bik.

Goal ropui tam tak a khung zingah kum 2005-a Stamford Bridge lama a khung chu sawi zui tlak a ni a, Chelsea defender hmaah Ronaldinho hian ball tidingin a taksa a sawi kual vel hnuah box pawn aṭangin goal mawi a khung.

Ronaldinho tluk pui emaw a aia thiam an la piang leh ang a, amaherawhchu Brazilian star zunzama uai tawh chuan ani ang renga danglam chu an hmu tawh lo ang.