Australia Open : Hriat hlawh lo tleirawl duhawm Kostyuk

Australian Open khelh mekah tleirawl duhawm a inlar. Thawhlehni zan khan kum 15 mi lek Marta Kostyuk chuan Olivia Rogowska hnehin last 32 a inhlangkai a, tun hnai kum 20 chhungin Grand Slam inelna huanga third round lut thei naupang ber a ni.

Margaret Court Arena-a inkhelah world number 521 Kostyuk hian 6-3, 7-5 in hnehna a chang, a match lehpek atan vawiin hian a hnampui leh seeded palina ni bawk Elina Svitolina a hmachhawn leh ang. Ukranian nula Kostyuk hian a match hmasa zawkah seeded chang phak Peng Shuai a hneh tawh bawk.

Kum 1997 US Open-ah khan Mirjana Lucic-Baroni chuan kum 15 mi lek nichungin third round a lut tawh a, ani hnuah chuan Kostyuk hi major tournament-a second round paltlang thei naupang ber a ni. Australian Open bikah chuan Martina Hingis (1996) hnua third round lut thei naupang ber a ni.

Nikum lawk kha chuan Kostyuk hi Australian Open girls inelna huangah inlanin a champion. Kostyuk chuan, "Court chhungah khan lum ka ti em em a, mahse hnehna ka chan tho avangin a nuam ka ti hle," tiin a sawi.

World number 521 Kostyuk chuan, "Nikum April thla khan ti hian ka ngaihtuah, junior champion ka ni thei a nih chuan nakkum atan wildcard ka dawng thei hlauh mai thei. Mahse, tunah chuan inelna lianah match hnih ka khel a, hnehna ka chang ta mai si, mumanga cheng ang mai ka ni," tiin a sawi.

Kostyuk hian main draw thleng tur hian qualifier match hnih a paltlang, a match hmasa berah set hloh nghal mah se harsa takin hnehna a chang a, inelna tak a thlen hnuah erawh match hnih khel tawhin set a la hloh lo thung!

Melbourne Park-a inkhel dangah Wimbledon champion Garbine Muguruza chuan wildcard hmanga inlan Jessika Ponchet chu 6-4, 6-3 in a hneh a, set hloh loa hnehna a chang thei hi bul ṭanna duhawm a ni thei ang.

Spain nula Muguruza hi season tir teah khan hliam vangin a buai, Brisbane International leh Sydney International aṭangin a inhnukdawk a, mahse inelna lianah erawh harsatna nei loin a khel thei. Set hmasa zawkah chauh pawh winners vawi 16 bakah aces vawi li a vaw chhuak thei a, a ball vuak a dikin a na hle.