Parker-a thusawiin Joshua nuih a ti za!

Anthony Joshua March 31-a a hmachhawn tur Joseph Parker-a'n damdawi hman phal loh hmang ṭhina puh chunga "King of Steroids" tia a puhna chu a nuih a, "Thu lawilo sawi hi an hrat em em a, thil thar pawh a ni tawh lo," a ti.

Kum 28 mi Joshua chuan sawi zawmin, "Ka record te hi thianghlim taka ka hlawhchhuah vek a ni a, chuvangin ka sawi ka sawi ve ngai a ni. Thu lawilo sawi hi boxing-ah chuan an ching ṭhin a, mah se kan fight tih ngaihnawm emaw en tura mipui hip nan hman tur a ni lo. Hetiang hi kei chuan ka ti ve ngai lo ang," a ti.

Parker hian New Zealand radio-in an kawmnaah he thu hi a sawi chhuak a, mah se a hnuah ngaihdam dil lehin, "Thu awmze nei lo ka sawi a, Joshua hian damdawi hman phal loh a hman ka ring lo," a ti. Kiwi boxer chuan sawi zawmin, "Joshua hi hun rei tak chhung ka lo thlithlai tawh a, a chakna ka hria a, ani pawhin min hria ang. A chak lohna lai pawh ka hria a, ani pawhin ka chak lohna lai a hria niin a inngai. A khabeah tak hnekin ka knockout theih ka beisei," a ti.

Joshua hi Wladimir Klitschko nen nikuma an inhmachhawn ṭum khan Ukrainian boxer hian a khabeah tak hnek fuhin a tlu a, Parker chuan hei Joshua chak lohnaah a ngai. Joshua chuan, "Inhnek ka hmachhawn tawhah vawi thum chu hnek tluk emaw tih nat ka ni ve tawh a, mah se kha thil aṭanga ka zirchhuah chu tunah chuan min dang tur chuan mihring aia ropui nih a ngai ang," tiin hlauh a neih loh thu a sawi.

British boxer Joshua hi IBF, WBA leh IBO champion a nih laiin Parker hi WBO champion a ni thung a, Principality Stadium, Cardiff-a an inhnek tur hi Britain-a heavyweight champion lai pahnih intawn hmasak ber tur a ni.