Rafael Nadal chak chhunzawm

Australian Open champion tum Rafael Nadal chuan nimin khan Leonardo Mayer chu straight set-a hnehin last 32 a lut. Inkhel dangah Jo-Wilfried Tsonga pawhin set nga zet an khelh hnuah Denis Shapovalov a hneh hram bawk.

Rod Laver Arena-ah world number 1 Nadal-a'n chak zawk tura rinkai a nih ang ngeiin a tir aṭangin inkhel a thunun a, darkar hnih leh minute 38 chhungin world number 52 Mayer chu 6-3, 6-4, 7-6 (7-4) in a hneh.

Seeded pakhatna Nadal hian Zirtawpniah world number 30 Damir Dzumhur a hmachhawn leh ang. Bosnia and Herzegovina tlangval Dzumhur hian John Millman chu 7-5, 3-6, 6-4, 6-1 in a hneh ve bawk a ni.

Tennis inelna lian paliah set nga hmanga chak zawk zawn a ni a, tourna­ment dangah erawh set thum an khel thung. France tlangval Tsonga chu set hnuhnung ber an khelh laiin 5-2 in hnufual zawk mah se tho chhuak leh thoin 3-6, 6-3, 1-6, 7-6 (7-4), 7-5 in hnehna a chang. Tsonga bakah seeded parukna Marin Cilic leh kum 39 mi Ivo Karlovic te pawhin third round an lut ve bawk.

Nadal a dam
Spain tlangval Nadal-a'n season hmasa khan US Open nomawi a chawi hnuah a khup hliam vangin ATP World Tour Finals a khel lo, Australian Open a khelh hma hian tournament pangngai khelh a nei lo. Mahse, inelna tak an khelh hnuah Nadal chu player hlauhawm a ni, tun hma lama vawi li a hneh tawh Mayer lakah a vawi nga nan hnehna a chang nawn.

Kum 31 mi Nadal chuan, "A zawna vawi hnih hnehna ka chang thei hi ka lawmin ka tan a pawimawh hle. Leonardo hi player rilru paukhauh tak a ni a, a ball vuak a nain hmachhawn a harsa hle," tiin a sawi.

Grand Slam vawi 16 champion tawh Nadal hian kum 2009 khan Melbourne Park-ah hian nomawi a lo chawi tawh a, hard court inelna lianah hian a ṭum hnih nan leh major title 17-na ni turin champion a tum ruh hle, season hmasa khan final-ah Roger Federer a hneh lo a ni.

Nadal chuan, "Australian Open hi ka tournament ngainat berte zinga mi a ni a, kuminah hian a sang thei ang ber thlen ka tum. Match tinah tihsual neih tlem zel ka tum ang," a ti. Mayer lakah Nadal-a'n unforced errors vawi 10 chiah a nei a, winners vawi 40 a vaw chhuak thei thung.