Aizawla lo zin tur Neroca an chak
Manipur club Neroca-in I League-a an season hmasa berah tlangnel takin an khelh chhunzawm zel a, Thawhlehni zan I League inkhela an mikhualna ramah Indian Arrows chu 2-0 in an hneh - table-ah pathumnaah an invawrhkai.
Goa-a inkhelah hian defender Anwar Ali chuan an lamah a ti lut a, Felix Odili Chidi chuan hun pek belhah chak nemnghehna goal a khung bawk. Neroca-ah Mizo tlangval David Lalbiakzara a lut lo a, Arrows tan Edmund Lalrindika chuan inkhel bul a ṭan thung.
Neroca an ṭha
Manipur club tan I League-a an season hmasa ber ni mah se India rama football inelna sang berah an tlangnel nghal a, match kua an khelh tawhah vawi khat chiah an la tlawm - an result neih ṭhat chhanah coach Gift Raikhan hming lam hmaih theih ni lo mah se tawnhriat nei ngah tawh player an kawl hnem avangin club thar nichungin an tlangnel nghalah a ngaih theih.
Tlarhnungah Indian football ngainatute tan Gouramangi Singh hai theih a ni lo a, Manipur defender hian a thiam ngaiin a la thiam reng - Neroca tan ban rinawm a ni. Manipur-in an tualchhung player tawnhriat nei ngah tawh sa an chhawr nasa a, Mangi bakah hian Shillong Lajong, Mumbai City leh Mohun Bagan tana khel tawh Subhash Singh leh India tana vawi 27 inlan tawh striker Sushil Kumar Singh te chu Indian player an neih langsar an ni.
Fak phu Raikhan
Neroca-in an tualchhung coach Gift Raikhan kaihhruaina hnuaiah I League khel turin an inpetkai a, India rama football inelna sang ber an khelh hnuah pawh Manipur coach hi an rin chhunzawm - an ring sual lo. Player a nih lai pawha tawnhriat ngah tawh tak coach hian tualchhung leh ram pawn player a neihte thiam takin a chhawr a, 4-4-2 formation hmangin a team a khelhtir tlangpui.
Manipur tlangval hian player a nih laiin left back-ah a khel ṭhin a, a hnunlaia Indian club langsar Churchill Brothers, HAL, Indian Bank, Vasco leh Pune FC tan a khel hman. Inkhelh a chawlhsan hnuah Pune FC-ah a cham chhunzawm a, 2008-10 season inkarah khan U17 leh U15 coach a ni a, kum 2011-ah Pune F.C. Academy head coach-ah hlankai niin U20 chu 2012 I League U20-ah a champion pui - hetih hunlaia an striker pawimawh chu tuna Aizawl FC striker William Lalnunfela a ni. September 2013-ah Pune FC senior team assistant coach-ah hlankai a ni leh a, tunah chuan Neroca thluak bur a ni ta.
Ram pawn player
I League khelh mekah Neroca hi foreign player nei ṭha pawla chhal ngam an ni.
Kum 28 mi Fabien Vorbe hi USA lam thlenga tawnhriat lo nei tawh a ni a, an ram team Haiti U17 aṭanga senior team tan thlengin a khel tawh bawk. Akhlidin Israilov hi kum 23 mi lek ni chunga Kyrgyzstan tana vawi 12 inlan tawh a ni a, Ukrainian club ṭha Dynamo Kiev tana lo khel tawh a nih bawk avangin a chhe thei lo.
Tlar hnunga ban rinawm Aryn Williams hi kum 24 lek a la ni a, Australian defender hi Premier League club Burnley aṭanga inzirchhuak niin A League club Perth Glory tan a khel tawh bawk a, a palen avangin a ṭangkai hle.
Liberia international Varney Kallon hi kum 42 lai ni tawh mah se 1996-a ram tana a match hmasa ber khel tawhtu defender hi tawnhriat a ngah tawh avangin game boruak sangah a chhawr tlak hle.